30 Mar 2016, 13:19
ސައިކަލު ސައިލެންސަރު މޮޑިފައިކޮށްގެން "ބިރުވެރިކަން އުފެދޭގޮތަށް" ދުއްވާ 100 އަށްވުރެ ގިނަ ސައިކަލުގެ ސައިލެންސަރު ބަދަލުކޮށްފައިވާ ކަމަށް ފުލުހުން ބުނެފިއެވެ.
ހެޑް އޮފް ޓްރެފިކް ޕޮލިސް ޑިޕާޓްމަންޓް މުހައްމަދު ދާއޫދު "ސަން"އަށް ވިދާޅުވީ ޓްރެފިކް ޕޮލިހުން ހިންގާ އޮޕަރޭޝަންތަކުގައި އެފަދަ ގިނަ އަދަދެއްގެ ސައިކަލު ޕޮލިހުންގެ ބެލުމުގެ ދަށަށް ގެނެސް ފުލުހުންގެ ބެލުމުގެ ދަށުގައި ސައިކަލުތައް ބަހައްޓައި ވެރިފަރާތް ލައްވައި ސައިލެންސަރުތައް ބަދަލު ކުރަމުން އަންނަ ކަމަށެވެ.
މިދިޔަ އަހަރު ފަހުކޮޅު ފެށި އެ މަސައްކަތުގެ ތެރެއިން މިހާ ހިސަބަށް 100 އަށްވުރެ ގިނަ ސައިކަލުގެ ސައިލެންސަރު ބަދަލުކޮށްފައިވާ ކަމަށް ދާއޫދު ވިދާޅުވި އެވެ.
"އެފަދަ ބިރުވެރިކަން ނުހުންނަ އާންމުކޮށް މި ދުއްވާ ވައްތަރުގެ ސައިލެންސަރު އަޅުވައިގެން ވާނީ ވަރަށް ގިނަ އަދަދެއްގެ ސައިކަލު ނެރެފައި،" ދާއޫދު ވިދާޅުވި އެވެ.
އޭނާ ވިދާޅުވީ އެ މަސައްކަތް އަދިވެސް ހުއްޓާނުލާ ކަމަށާއި އެގޮތަށް ފާހަގަކުރެވޭ ސައިކަލްތައް ހިފަހައްޓައި ވެރިފަރާތް ލައްވައި ސައިލެންސަރު ބަދަލު ކުރަމުން އަންނަ ކަމަށެވެ.
މަގުމަތީގައި ބިރުވެރިކަން އުފެދޭ ގޮތަށް ދުއްވާ އެފަދަ ސައިކަލުތަކަށް ޓުރެފިކް ގާނުނުގެ ތެރެއިން އަޅާނެ ފިޔަވަޅެއް ނެތުމުން ގޭންގު ކުށްތައް ހުއްޓުވުމުގެ ގާނޫނުގެ ދަށުން ދަނީ ފިޔަވަޅުއަޅަމުން ކަމަށް ވެސް ދާއޫދު ވިދާޅުވިއެވެ.