28 Mar 2016, 14:56
މިދިޔަ އަހަރުގެ ފެބްރުއަރީ މަހާ އަޅާ ބަލާއިރު މިއަހަރު ފެބްރުއަރީ މަހު ޗައިނާއިން ރާއްޖެއަށް އައި ޓޫރިސްޓުންގެ އަދަދު މީގެ ކުރިން ދަށަށް ނުދާ ވަރަށް ދަށް ވެއްޖެ އެވެ.
ޗައިނާ އަކީ ރާއްޖޭގެ ޓޫރިޒަމުން އެންމެ ގިނައިން އަންނަ ގައުމެވެ. ޗައިނާ އިން އައި ޓޫރިސްޓުންގެ އަދަދު މީގެ ކުރިން ދަށަށް ނުދާ ވަރަށް ދަށަށް ދިޔަ ނަމަވެސް، ތަފާސް ހިސާބުތައް ދައްކާ ގޮތުން މިދިޔަ މަހު އެންމެ ގިނަ ފަތުރުވެރިން ރާއްޖެއަށް އައީ ވެސް ޗައިނާ އިންނެވެ.
ޓޫރިޒަމް ތަފާސް ހިސާބުތައް ދައްކާ ގޮތުން، މިދިޔަ ފެބްރުއަރީގައި ޗައިނާއިން ރާއްޖެއަށް ޒިޔާރަތްކޮށްފައި ވަނީ 34،330 ފަތުރުވެރިންނެވެ. ނަމަވެސް މިދިޔަ އަހަރު ފެބްރުއަރީގައި 43،349 ފަތުރުވެރިން ވަނީ ޗައިނާ އިން ރާއްޖޭއަށް އައިސްފަ އެވެ. އެހެންކަމުން މިއަހަރު ފެބްރުއަރީގައި ޗައިނާ އިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 20.8 ޕަސެންޓް ދަށެވެ.
ޗައިނާގެ މާކެޓް ފެބްރުއަރީގައި ދަށަށް ދިޔަ ނަމަވެސް، ޔޫރަޕްގެ ގައުމުތަކުން ފަތުރުވެރިން ރާއްޖެއަށް އައި އަދަދު ވަނީ މަތިވެފަ އެވެ. އެގޮތުން ޔޫރަޕްގެ ގައުމުތަކުން ފަތުރުވެރިން އައި އަދަދު ގާތްގަނޑަކަށް 10 ޕަސެންޓާއި 20 ޕަސެންޓާ ދެމެދުގެ އަދަދުތަކަށް ވަނީ އިތުރުވެފަ އެވެ.
ޔޫރަޕްގެ ގައުމުތަކަށް ބަލާއިރު ފެބްރުއަރީ މަހު އެންމެ ބޮޑު ކުރިއެރުމެއް ލިބުނީ ޔޫކޭ އިންނެވެ. އެގޮތުން އެ ގައުމުން މިއަހަރު ފެބްރުއަރީގައި 10،603 ފަތުރުވެރިން އައިސްފައިވާ އިރު، އެއީ މިދިޔަ އަހަރުގެ ފެބްރުއަރީ މަހާ އަޅާ ބަލާއިރު 21.1 ޕަސެންޓުގެ ކުރިއެރުމެކެވެ.
ދެ ވަނައަށް އެންމެ ބޮޑު ކުރިއެރުމެއް ލިބުނީ އިޓަލީ އިންނެވެ. އެގައުމުން 12.5 ޕަސެންޓުގެ ކުރިއެރުމަކާ އެކު 9253 ފަތުރުވެރިން އައިސްފައިވެ އެވެ. އޭގެ އިތުރުން ޖަރުމަނުން 4.1 ޕަސެންޓުގެ ކުރިއެރުމަކާ އެކު 9247 ފަތުރުވެރިން އައިސްފައިވާ އިރު، ރަޝިއާ، ޑެންމާކް އަދި ސްވެޑަން ފަދަ ގައުމުތަކުން ފަތުރުވެރިން އައި އަދަދުވެސް ވަނީ ގާތްގަނޑަކަށް 15 ޕަސެންޓް އިތުރުވެފަ އެވެ.
މެދުއިރުމަތީގެ ގައުމުތަކަށް ބަލާއިރު، ކުވައިތު ފިޔަވައި އެހެން ގައުމުތަކުން ފެބްރުއަރީ މަހު ރާއްޖެއަށް އައި ޓޫރިސްޓުންގެ އަދަދު ވެސް ވަނީ އިތުރުވެފަ އެވެ.