28 Mar 2016, 10:15
ދިއްލީ (މާޗް 28): ފިރިމީހާ އަށް "ފަލަ އެތެކޭ" ގޮވުމަކީ "ކައިވެނީގެ ގުޅުން ހަލާކުކޮށްލާ" ކަމެއް ކަމުން، އެއީ ވަރި ކުރުން ހުއްދަ ކުރާ ސަބަބެއް ކަމަށް އިންޑިއާގެ ހައިކޯޓަކުން ނިންމައިފި އެވެ.
އަނބިމީހާ ފިރިމީހާ އަށް "ފަލަ އެތެކޭ" ގޮވައި ޖިންސީ އެދުންތައް ފުއްދަނުދޭ ކަމަށް ބުނަމުން ދިޔުމުގެ ސަބަބުން ފިރިހެނަކު އެންމެ ފުރަތަމަ އިންޑިއާގެ ފެމިލީ ކޯޓަކަށް މައްސަލަ ހުށަހެޅީ 2012 ވަނަ އަހަރު އެވެ. އަދި ފެމިލީ ކޯޓުން ވަނީ އެފިރިހެންމީހާ އަށް އޭނާގެ އަނބިމީހާ ވަރިކުރުމުގެ ހުއްދަ ދީފަ އެވެ. ފަހުން އެއަންހެން މީހާ އެހުކުމާ ދެކޮޅަށް މައްސަލަ ހުށަހެޅުމުން ފެމިލީ ކޯޓުގެ ނިންމުމަށް ތާއިދު ކުރަން ދިއްލީ ހައި ކޯޓުން ނިންމީ ކަމަށް ހިންދުސްތާނު ޓައިމްސްގައިވެ އެވެ.
"ފިރިމީހާ ފަލަ ވިޔަސް، އަނބިމިހާ އޭނާގެ ފިރިމީހާއަށް ވަނަން ކިޔުމާއި "އެތެކޭ" ނުވަތަ "ފަލަ އެތެކޭ" ކިޔާ ފުރައްސާރަ ކުރުމަކީ ފިރިމީހާގެ ގަދަރާއި އިއްޒަތަށް އަސަރު ކުރާނެ ކަމެއް،" ފަނޑިޔާރު ވިޕިން ސަންހީ ވިދާޅުވި އެވެ.
އަންހެން މީހާ އިސްތިއުނާފަށް މައްސަލަ ހުށަހެޅި އިރު އޭނާ ވަނީ ފެމިލީ ކޯޓުން މައްސަލަ ނިންމާފައި ވަނީ "އެއްވެސް ސީދާ ހެއްކެއް" ނެތި ކަމަށް ބުނެފަ އެވެ. ނަމަވެސް، ހައިކޯޓުން ވަނީ އަންހެންމީހާގެ ވާހަކަ ގަބޫލު ކުރެވެން ނެތް ކަމަށް ބުނެފަ އެވެ.
ނަން ހާމަނުކުރުމަށް އެދި އެފިރިހެން މީހާ މެއިލް ޓުޑޭއަށް ދިން އިންޓަވިއުއެއްގައި އޭނާ ވަނީ، އޭނާގެ އަނބިމީހާ ވަނީ އޭނާ އަށް މަލާމާތް ކުރުމުގެ އިތުރުން އޭނާގެ އާއިލާއަށް ވެސް ފުރައްސާރަ ކޮށްފައި ކަމަށް ބުނެފަ އެވެ. އަދި ހަ އަހަރުވީ އެކައިވެނީގެ ސަބަބުންނާއި ޝަރީއަތްތަކުގެ ސަބަބުން އޭނާގެ ވިޔަފާރިއަށް ބޮޑު ގެއްލުމެއްވެފައިވާ ކަމަށް ބުނެފަ އެވެ.
މެއިލް ޓުޑޭގައިވާ ގޮތުން އެދެމީހުންގެ 10 އަހަރުގެ ކުޑަކުއްޖެއް ހުރެ އެވެ. އެކުއްޖާ ދިރިއުޅެނީ މަންމައާ އެއްކޮށެވެ. (މެއިލް ޓުޑޭ)