27 Mar 2016, 20:18
މުދަލުގެ ޒަކާތް ބަލައިގަތުން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އާ މިއަދު ހަވާލުކޮށްފި އެވެ.
މިއަދާ ހަމައަށްވެސް މުދަލުގެ ޒަކާތް ބަލައިގަންނަމުން އައީ އިސްލާމިކް މިނިސްޓްރީއާއި ކައުންސިލް އިދާރާތަކުންނެވެ.
އިސްލާމިކް މިނިސްޓްރީގައި މިއަދު ބޭއްވި ރަސްމިޔާތެއްގައި އިސްލާމިކް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ، އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު އެވެ. މީރާގެ ފަރާތުން އެއްބަސްވުމުގައި ސޮއިކުރެއްވީ ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުހައްމަދެވެ.
އެ އެއްބަސްވުމުގައިވާ ގޮތުން އަންނަ ޖޫންމަހުގެ އެއްވަނަ ދުވަހުން ފެށިގެން ރާއްޖޭގެ ހުރިހާ ހިސާބެއްގައި މުދަލުގެ ޒަކާތް ބަލައިގަތުމާ ގުޅޭ އެންމެހާ ކަންކަން ކުރަމުންގެންދާނީ މީރާއިންނެވެ.
ރަސްމިއްޔާތުގައި ވާހަކަދައްކަވަމުން އިސްލާމިކް މިނިސްޓަރު ވިދާޅުވީ، މުދަލުގެ ޒަކާތަކީ ވަރަށް ގިނަބަޔަކު އިހުމާލުވެފައިވާ ކަމެއް ކަމަށާއި ރާއްޖޭގައި މުދަލުގެ ޒަކާތް ދައްކަމުން އަންނަނީ އާބާދީގެ ދެ ޕަސެންޓާ ފަސް ޕަސެންޓާ ދެމެދުގެ އަދަދެއްގެ މީހުން ކަމަށެވެ.
ނަމަވެސް މީރާ އާއެކު މިއަދު ވެވުނު އެއްބަސްވުމުގެ ސަބަބުން މުދަލުގެ ޒަކާތް ނެގުމަށް މިހާރު ކުރަމުން އަންނަ މަސައްކަތް ހަރުދަނާވެގެންދާނެ ކަމަށާއި، އެކަމުގެ ސަބަބުން މިހާރަށްވުރެ ބޮޑު އާމްދަނީއެއް ދައުލަތަށް ލިބިގެންދާނެކަމަށްވެސް މިނިސްޓަރު ވަނީ ވިދާޅުވެފަ އެވެ.
މިނިސްޓަރު ވިދާޅުވީ، މުދަލު ޒަކާތުގެ ގޮތުގައި މީރާއިން ބަލައިގަންނަ ފައިސާ ޖަމާކުރާނީ ދައުލަތުން އެކަމަށްޓަކައި ކަނޑައަޅާފައިވާ ހާއްސަ އެކައުންޓަކަށް ކަމަށާއި، ޒަކާތް ބެހުމުގައި ހަރަކާތްތެރިވާނީ ހަމައެކަނި އިސްލާމިކް މިނިސްޓްރީން ކަމަށެވެ.
އެ ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު ވިދާޅުވީ، ޒަކާތުގެ ފައިސާ ބަލައިގަތުމަށް މިހާރަށްވުރެ ހަރުދަނާ ނިޒާމެއް ގާއިމު ކުރައްވާނެ ކަމަށެވެ.
އެގޮތުން މުދަލުގެ ޒަކާތް ދައްކަންޖެހޭ ފަރާތްތައް ހޯދައި އެފަރާތްތައް ތަމްރީނު ކުރުމުގެ އިތުރުން، މުދަލު ޒަކާތް ބަލައިގަތުމަށް އިސްލާމިކް މިނިސްޓްރީން ކަނޑައަޅާފައިވާ އުސޫލުތަކަށް މީރާގެ މުވައްޒަފުން ހޭލުންތެރިކުރުވުމަށް ޕްރޮގްރާމްތަކެއް ހިންގާނެ ކަމަށް އޭނާ ވިދާޅުވި އެވެ.
އޮޑިޓާ ޖެނެރަލް ނެރުއްވާފައިވާ 2013 ވަނަ އަހަރުގެ އިސްލާމިކް މިނިސްޓްރީގެ އޮޑިޓް ރިޕޯޓްގައި ބުނެފައި ވަނީ މުދަލު ޒަކާތުގެ ގޮތުގައި ކައުންސިލްތަކަށް ލިބިފައިވާ ފައިސާ އިސްލާމިކް މިނިސްޓްރީ އަށް ލިބުނުކަން ކަށަވަރު ކުރެވެން ނެތް ކަމަށެވެ.
އޮޑިޓް ރިޕޯޓްގައި ލަފާދީފައި ވަނީ މުދަލު ޒަކާތުގެ ގޮތުގައި ބަލައިގަންނަ ފައިސާ މޮނީޓާކޮށް ބެލޭނެ އިންތިޒާމް މިނިސްޓްރީގައި ގާއިމްކުރުމަށާއި އެ ފައިސާ ގަވާއިދުން ޖަމާކުރެވޭކަން ކަށަވަރު ކުރުމަށެވެ.