26 Mar 2016, 12:43
ސުޝާންތު ސިންގް ރާޖްޕުތު އަދި އަންކިތާ ލޮކާންޑު އެންމެ ފުރަތަމަ އެކުގައި ފެނިގެން ދިޔައޯ ޒީޓީވީ އިން ގެނެސްދިން އެކްތާ ކަޕޫރުގެ މަގުބޫލު ސީރީޒް، ޕަވިތްރަ ރިޝްތާއިންނެވެ.
ދެ މީހުންގެ އޮން ސްކްރީން ކެމިސްޓްރީ ބެލުންތެރިންނަށް އިންތިހާއަށް ކަމުދިޔަ އިރު، އެންމެ ފަހުން ދެމީހުން ވަނީ ދެ ތަރިންނަކީ ކެމެރާގެ ފުރަގަހުގައި ވެސް ޖޯޑެއް ކަން ހާމަކޮށްފަ އެވެ. ދެ ތަރިންގެ ގުޅުން ސީރިއަސް ވެގެން ގޮސް، ސުޝާންތު އަންކިތާ ގާތު ކައިވެންޏަށް އަހާފައި ވަނީ ވެސް އެތައް ބައެއް ބަލަމުން ދިޔަ "ޖަލަކް ދިކްލާޖާ" ޝޯގެ ތެރެއިންނެވެ.
އެ ދެ ތަރިންގެ ގުޅުމަކީ ވަކި ނުކުރެވޭ ވަރަށް "ޕަވިތްރަ ރިޝްތާ"އެއް ކަމުގައި ބެލެވުނު އިރުު، ސުޝާންތު ވަނީ އަންނަ ޑިސެމްބަރުގައި ދެ ތަރިން ކައިވެނި ކުރަން ނިންމާފައިވާކަން ވެސް ހާމަކޮށްފަ އެވެ.
ނަމަވެސް، ކެޓްރީނާ ކައިފާއި ރަންބީރު ކަޕޫރު އަދި ވިރާތު ކޯލީއާ އަނުޝްކާ ޝަރުމާގެ ފަހަތުން "ބޮލީވުޑު ބްރޭކް އަޕް" ލިސްޓަށް ސުޝާންތު އަދި އަންކިތާގެ ޖޯޑު ވެސް އިތުރުވެފައިވާ ކަމަށް އިންޑިއާ ނޫސްތަކުން މިވަނީ ބުނެފަ އެވެ.
ދެ ތަރިންނާ ވެސް ވަރަށް ގާތް ފަރާތަކުން އިންޑިއާގެ ނޫސްތަކަށް ކަށަވަރުކޮށްދީފައިވާ ގޮތުގައި، މިހާރު ދެ ތަރިން ވަނީ ވަކިވެފަ އެވެ.
އެންމެ ފަހުން އެ ދެތަރިން އެކުގައި ފެނިގެން ގޮސްފައި ވަނީ ވެސް ފެބުރުއަކީ ހަތަރު ވަނަ ދުވަހު ބޭއްވި ޒީ ސިނެ އެވޯޑްގެ ތެރެއިންނެވެ. އޭގެ ފަހުން ބޭއްވި އެއްވެސް ހަފްލާއަކުން ދެ ތަރިން އެކުގައި ފެނިފަ އެއް ނުވެ އެވެ.
ނަމަވެސް ދެ ތަރިންގެ ގުޅުން ނިމުމަކަށް އައި ކަމަށް ވާހަކަތައް ދެކެވެން ފެށީ، ސުޝާންތުގެ އުފަން ދުވަހުގެ ޕާޓީ އިން އަންކިތާ ނުފެނުމުންނެވެ. އެއީ ދެ ތަރިންގެ ދެމެދުގައި މައްސަލައެއް ޖެހިގެން ކަމަށް ކުރިން ހީވި ނަމަވެސް، ދެ މީހުން އެކުގައި އުޅެމުން ދިޔަ ގެއިން ވެސް ސުޝާންތު ނުކުމެފައިވާ ކަން މިހާރު ވަނީ ހާމަވެފަ އެވެ.
ސުޝަންތާ އަންކިތާ ވަކިވީ، އަންކިތާގެ ހުންނަ "ދަށުކޮށްލުމުގެ" ސިފައެއްގެ ސަބަބުން ކަމަށް ބައެއް ރިޕޯޓުތައް ބުނެ އެވެ. ނަމަވެސް އެ ދެމީހުންނާ ވަރަށް ގާތް ފަރާތަކުން ދެމީހުން ކުގައި ހޭދަކުރަން ލިބޭ ވަގުތު މަދުވެ ލޯބި ފަނޑުވީ ކަމަށެވެ. އަދި އެއީ ސުޝާންތު ބޮލީވުޑުގައި ފިޔަޖަހަން ފެށުމުގެ ސަބަބުން ދިމާވި ކަމެއް ކަމަށްވެސް ބެލެވެ އެވެ.
"އަލުން ގުޅުމަކީ ވެސް އެކަށީގެންވާ ކަމެއް. ދެމީހުން އެކަކު އަނެކަކު ދަންނަތާ މިހާރު ދިހަ އަހަރަށް ވުރެ ގިނަ ވެއްޖެ،" އެ ފަރާތުން ބުނެފައިވެ އެވެ.
ޕަރިނީތީ އަދި ސުޝާންތު
ވާހަކަތައް މިހެން ދެކެވުނު ނަމަވެސް، ދެމީހުން ވަކިވާން ޖެހުނު ހަގީގީ ސަބަބަލީ ސުޝާންތު އަދި ކާމިޔާބު އެކްޓްރެސް ޕަރިނީތީ ޗޯޕްރާގެ ގުޅުން ކަމަށް ވެސް ހަބަރުތައް ބުނެ އެވެ. "ޝުދް ދޭސީ ރޮމޭންސް"ގައި އެކުގައި ފެނިގެން ދިޔަ ދެ ތަރިން މިހާރު ވެސް އަންނަނީ އެކުގައި ފިލްމެއްގެ މަސައްކަތް ކުރަމުންނެވެ. ޕަރިނީތީ އަދި ސުޝާންތު މާބޮޑަށް ގާތް ވުމަކީ، އަންކިތާއާ ރުޅިވި ސަބަބު ކަމަށް އަޑުތައް ވަނީ ފެތުރިފަ އެވެ.