25 Mar 2016, 21:42
ގޭންގުތަކުގައި ހަރަކާތްތެރިވާ އިތުރު ފަސް މީހެއްގެ މައްޗަށް މޮނިކޮން އަމުރު ހައިކޯޓުން ނެރެފި އެވެ.
ފުލުހުންގެ އިންފޮމޭޝަން އޮފިސަރު އިސްމާއީލް އަލީ މިރޭ ސަން އަށް ގޭންގުތަކުގައި ހަރަކާތްތެރިވާ ފަސް މީހެއްގެ މައްޗަށް މޮނިޓަ ކޮށް ކޮންޓްރޯލް ކުރުމުގެ އަމުރު ނުވަތަ މޮނިކޮމް އަމުރު ހައިކޯޓުން ނެރުނީ އިއްޔެ ކަމަށެވެ.
އެ ފަސް މީހުންގެ މަައްޗަށް އަމުރު ނެރެން ހައިކޯޓުގައި އެދުމަށް ފުލުހުންނަށް އެންގީ ހޯމް މިނިސްޓަރު އުމަރު ނަސީރެވެ.
ހައިކޯޓުން ވަނީ އެމީހުން މޮނީޓަރކުރުމުގެ ގޮތުން ރޭގަނޑު 10:00 އާއި ހެނދުނު 06:00 އާއި ދެމެދު ގެއިން ބޭރަށް ނުދިއުމާއި، މިނިސްޓަރުގެ ހުއްދަ ނެތި މާލެ އިން ފުރައިގެން ނުދިއުމާއި އަމުރުގައި ކަނޑައަޅާފައިވާ ވަކި ސަރަހައްދުތަކަކަށް ނުދިއުމާއި އެމީހުންގެ މާލީ މުއާމަލާތްތަކާއި މުދާ ކޮންޓްރޯލްކުރުމުގެ ގޮތުން ފިޔަވަޅު އެޅުމާއި އެމީހުން މުއާސަލާތީ މުއާމަލާތްތައް ކޮންޓްރޯލްކުރުމާއި ފުލުހުންގެ މަރުކަޒަށް ހާޒިރުވެ ސޮއިކުރުމާއި އިލެކްޓްރޯނިކް އާލާތްތައް އެމީހުންގެ ހަށިގަނޑުގައި ނުވަތަ ދިރިއުޅޭތަނުގައި ހަރުކުރުމާއި އެމީހެއްގެ ފޮޓޯ އާއި ދިރިއުޅޭ ތަންތަނުގެ ފޮޓޯ އާއި އެމީހެއްގެ ފިންގާ ޕްރިންޓް ފަދަ ސާމްޕަލްތައް ނަގައި އެމީހުން މޮނީޓަރކޮށް ކޮންޓްރޯލްކުރުމަށް އަމުރުކޮށްފަ އެވެ.
އެމީހުންގެ ފޮޓޯ އާއި މައުލޫމާތު އަދި ހާމަކޮށްފައެއް ނުވެ އެވެ.
ގޭންގުތަކުގައި ހަރަކާތްތެރިވާ ހަ މީހެއްގެ މައްޗަށް ހައިކޯޓުން މިދިޔަ ބުރާސްފަތި ދުވަހު ނެރުނު އަމުރު ތަންފީޒު ކުރުމުގެ ގޮތުންް އެމީހުންގެ ފައިގައި ޓެގް އަޅުވާފައިވާ ކަމަށް ވެސް އިސްމާއީލް ވިދާޅުވި އެވެ.
ހައިކޯޓުގެ އަމުރާ އެކު އަމުރު ތަންފީޒް ކުރަމުންދާ ހަ މީހުންނަކީ މ. ލިލީޕާކް ފަޒީލް ހަމީދު (25އ) އާއި، ގ. ކެރަފާގެ މުހައްމަދު ޝާބިލް އިސްމާއީލް (23އ) އާއި ދަފްތަރު އާރު އެސް. 9634 މިދުހަތު އަބޫބަކުރު (20އ) އާއި، ގއ. ދާންދޫ ފަހުދާ ވާދީ، ފައްސާން ވަލީދު (20އ) އާއި، މ. ހިއްސާ، އާތިފް އަބްދުލް ހަލީމް (24އ) އާއި، ދަފްތަރު ނަމްބަރު ޑީ.އެޗްއާރު. 1475، އަހްމަދު ރިޒާމް (26އ) އެވެ.
މޮނިކޮން އަމުރު ނެރެފައިވާ 11 މީހުންނަކީވެސް ގްރޫޕް ހަދައިގެން މުޖުތަމައަށް ނުރައްކާވާ ފަދަ ބޮޑެތި ކުށްތައް ތަކުރާރުކޮށް ކުރަމުން އަންނަ ބައެއް ކަމަށް ފުލުހުން ވަނީ ބުނެފަ އެވެ.