24 Mar 2016, 00:29
ރާއްޖޭގެ ރިސޯޓުތަކުން ލިބޭ ފައިސާ ރާއްޖެއިން ބޭރުގެ އެކައުންޓުތަކުގައި ނުބަހައްޓައި އެ ފައިސާތައް ރާއްޖެ ގެނެސް، އިންވެސްޓު ކުރުމަށް އެމްއެމްއޭގެ ގަވަރުނަރު އަޒީމާ އާދަމް އެދިވަޑައިގެންފި އެވެ.
ރައްޔިތުން މަޖިލީހުގެ މާލިއްޔަތު ކޮމެޓީގައި ވާހަކަފުޅުދައްކަވަމުން އަޒީމާ މިރޭ ވިދާޅުވީ ރާއްޖެއިން ބޭރުގައި ވިޔަފާރިވެރިން ބަހައްޓާ ފައިސާ، ރާއްޖެ ގެނެސްގެން އިންވެސްޓު ކުރެވޭނެ މާހައުލެއް ގާއިމް ކުރަންޖެހޭ ކަމަށެވެ.
"އަޅުގަނޑުމެން މި ބީދައިން ހަމަ ވާހަކަދައްކާއިރު އެ ފަރާތްތަކުން އިންވެސްޓު ކުރާނެ ޕްރޮޑަކްޓުތަކެއް ވެސް އެބަ އުފެދެންޖެހޭ. ބޭންކިން ސެކްޓާ ވެސް ފައިނޭންޝިއަލް ސެކްޓާ ވެސް އެބަ ވަރުގަދަ ވާންޖެހޭ އަދި ކެޕިޓަލް މާކެޓު ވެސް މިއަށްވުރެ ކުރިއަރައިގެން ރާއްޖެއިން ބޭރުގައި ވިޔަފާރިވެރިން މި ބަހައްޓާ ފައިސާ ރާއްޖެއަށް ގެނެސް އިންވެސްޓު ވެސް ކުރެވޭނީ،" އަޒީމާ ވިދާޅުވި އެވެ.
އަޒީމާ ވިދާޅުވި ގޮތުގައި އެއްވެސް ކަމަކީ ގަދަބާރުން ކުރެވޭނެ ކަމެއް ނޫނެވެ. އޭނާ ވިދާޅުވީ ރާއްޖެއިން ބޭރުގައި ވިޔަފާރިވެރިން ބަހައްޓާ ފައިސާ އެގޮތަށް ބޭރުގައި ނުބެހެއްޓޭނެ ކަމަށް ބުނެ "ދުވަސްކޮޅަކަށް ހިފަހައްޓައިގެން" ތިބެވިދާނެ ކަމަށެވެ. ނަމަވެސް އެކަމަކީ އެއްވެސް ސަރުކާރަކަށް އަބަދު ކުރެވޭނެ ކަމެއް ނޫން ކަމަށް އޭނާ ވިދާޅުވި އެވެ.
އަޒީމާގެ ވާހަކަފުޅުގައި ފާހަގަކުރެއްވީ ރިސޯޓު އޯނަރުން ނުވަތަ ވިޔަފާރިވެރިންގެ ފައިސާ ރާއްޖެއިން ބޭރުގައި ބަހައްޓަން ޖެހެނީ މިއަދު ރާއްޖޭގައި އިތުރަށް އިންވެސްޓުކުރާނެ ރަނގަޅު މާހައުލެއް ނެތުމުން ކަމަށެވެ.
މިރޭގެ ބައްދަލުވުމުގައި ވާހަކަފުޅުދައްކަވަމުން މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވީ، ރާއްޖެއިން ބޭރުގައި ވިޔަފާރިވެރިން ބަހައްޓަމުން ދަނީ އެ ފަރާތްތަކުގެ ވިޔަފާރިން ލިބޭ ފައިސާގެ ތެރެއިން ހަމައެކަނި ފައިދާގެ ގޮތުގައި ލިބޭ ފައިސާ ކަމަށެވެ. އަދި އެ ނޫން ފައިސާއެއް ވިޔަފާރިވެރިންނަށް ރާއްޖެއިން ބޭރުގެ އެކައުންޓުތަކުގައި ނުބެހެއްޓޭނެ ކަމަށް އޭނާ ވިދާޅުވި އެވެ.
"އެބޭފުޅުންނަށް (ވިޔަފާރިވެރިންނަށް) ރާއްޖެއިން ބޭރުގައި ބެހެއްޓޭނީ ހަމައެކަނި ޕްރޮފިޓް. އެބޭފުޅުންގެ އެ ޕްރޮފިޓު ގެންނާކަށް މަޖުބޫރެއް ނުކުރާނެ އެއްގޮތަކަށް ވެސް. އެއްވެސް އިންސްޓިޓިއުޝަނަކުން. އެއީ ކުރެވޭނެ ކަމެއް ނޫން،" ޝަރީފު ވިދާޅުވި އެވެ.
ޝަރީފު ވިދާޅުވީ ވިޔަފާރިވެރިން ރާއްޖެއިން ބޭރުގައި ބަހައްޓާ ފައިސާގެ ތެރެއިން ރާއްޖެ ގެންނަން މަޖުބޫރުވާ ފައިސާތަކެއް ހުންނާނެ ކަމަށެވެ. އެގޮތުން މުވައްޒަފުންގެ މުސާރަ އާއި ދައުލަތަށް ދައްކަންޖެހޭ ޓެކުހުގެ އިތުރުން އެ ވިޔަފާރި ކުރާ ތަނަކަށް ދައްކަންޖެހޭ ކުލީގެ ފައިސާއަކީ ރާއްޖެއަށް ގެންނަންޖެހޭ އެއްޗެއް ކަމަށެވެ.
އެމްއެމްއޭގެ އިތުބާރު ގެއްލޭނެ ގޮތަށް ވާހަކަފުޅު ނުދެއްކެވުމަށް އަޒީމާ މިރޭ ބޭއްވި ކޮމެޓީ ބައްދަލުވުމުގައި ވަނީ އެދިވަޑައިގެންނެވި އެވެ. އެކަމަނާ ވިދާޅުވީ ފައިނޭޝަން ނިޒާމުގެ އިތުބާރު ގެއްލިއްޖެނަމަ އެ އިތުބާރު އެއް އަހަރަކުން ނުވަތަ ދެ އަހަރަކުން އަނބުރާ ނުހޯދޭނެ ކަމަށާއި އެފަދަ ނިޒާމެެއްގެ އިތުބާރު ގެއްލިއްޖެނަމަ ގެއްލުންވާނީ ގައުމަށް ކަމަށެވެ.
"އެ އިތުބާރު ދެމެހެއްޓުމަށްޓަކާ ހުރިހާ ފަރާތްތަކުން ވެސް މަސައްކަތް ކުރައްޖެހޭ. ވަކި ފަރާތަކުންނެއް ނޫން، ޕާޓީތަކުން ވެސް ވާހަކަފުޅު ދައްކަވާއިރު އެމްއެމްއޭ އާއި ފައިނޭޝަލް ސެކްޓާ އިތުބާރު ގެއްލޭ ކަންތައްތައް ކުރެއްވުމަކީ ހަމަ ގައުމަށް ވެސް ގެއްލުން ލިބޭނެ ކަމެއް،" ގަވަރުނަރު ވިދާޅުވި އެވެ.
މާލިއްޔަތު ކޮމެޓީގެ މިރޭގެ ބައްދަލުވުމަކީ ރާއްޖެއިން ބޭރަށް ދަތުރުކުރާ ފަރާތްތަކަށް ބައެއް ބޭންކުތަކުން ޑޮލަރު ލިބުމުގައި ދައްޗާ ކުރިމަތިވާތީ އެކަމާ ގުޅޭ ގޮތުން މަޝްވަރާ ކުރުމަށް ބޭއްވި ބައްދަލުވުމެކެވެ. އެމްއެމްއޭއިން ބޭންކުތަކަށް ދޫކުރާ ޑޮލަރުތަކާއި ކުންފުނިތަކަށް މާލީ ފައިދާގެ ގޮތުގައި ވަންނަ ޑޮލަރުގެ ތަފްސީލުތަކާ ގުޅޭ ގޮތުން މިރޭގެ ކޮމެޓީގައި ގަވަރުނަރު ވާހަކަފުޅު ދެއްކެވި އެވެ. މިރޭގެ ކޮމެޓީ ނިންމަވާލެއްވީ އެ މައްސަލާގައި މަޝްވަރާ ކުރުމަށް އިތުރު ބައްދަލުވުމެއް ބާއްވާނެ ކަމަށް ވިދާޅުވުމަށްފަހުގަ އެވެ.