22 Mar 2016, 16:02
ތިން ސަތޭކަ މެޓްރިކް ޓަނުގެ ފެން އުފެއްދޭ ފެން ޕްލާންޓެއް، ގދ. ތިނަދޫގައި ބެހެއްޓުމަށް ދުބާއީގެ ކުންފުންޏަކާ ހަވާލު ކޮށްފި އެވެ.
ފެނަކަ ކޯޕަރޭޝަނުގައި މިއަދު ބޭއްވި ސޮއި ކުރުމުގެ ރަސްމިއްޔާތުގައި އެ ކުންފުނީގެ މެނޭޖިން ޑައިރެކްޓަރު އަހުމަދު ނިމާލު ވިދާޅުވީ އެ މަޝްރޫއުގެ މަސައްކަތް ހަވާލުކުރީ، އެ އިދާރާ އިން ކުރި އިއުލާނަކަށް އެންމެ ރަނގަޅު އަގެއް ހުށަހަޅި ދުބާއީގެ ކޮރޮޑެކްސް އިންޑަސްޓްރީސް ކުންފުންޏާ ކަމަށެވެ.
ނިމާލް ވިދާޅުވީ، އެ މަޝްރޫޢަކީ ފިނޭންސް މިނިސްޓްރީ އިން ހަމަޖައްސައިދިން ޚާއްސަ ބަޖެޓަކުން ކުރިޔަށް ގެންދާ މަޝްރޫޢެއް ކަމަށާއި އެ ކަމަށް ޖުމްލަ 3،628،325 މިލިޔަން ރުފިޔާ ޚަރަދު ކުރާނެ ކަމަށެވެ.
މިހާރު ގދ. ތިނަދޫގައި ހުންނަ ޑީސެލިނޭޝަން ޕްލާންޓުން 150 މެޓްރިކް ޓަނުގެ ފެން އުފައްދަ އެވެ. އެހެން ނަމަވެސް، ތިނަދޫގައި އަޅަމުންދާ ފްލެޓުތަކުގެ މަޝްރޫއު ހަ މަސް ދުވަހުގެ ތެރޭގައި ނިމި، ފެނަށް ބޮޑު ޑިމާންޑެއް އުފެދުމުން އެ މިންވަރަކީ ތިނަދޫގެ ހުރިހާ ރައްޔިތުންނަށް ފެން ފޯރުވައިދިނުމަށް އެންމެ އެކަށީގެންވާ މިންވަރެއް ނޫން ކަމަށް ނިމާލް ވިދާޅުވި އެވެ.
"މި [އައު ޕްލާންޓް] އިންސްޓޯލް ކުރެވިގެން ދިޔައިމާ، ދެ ޕްލާންޓުން ޖުމްލަ 450 މެޓްރިކް ޓަނުގެ ފެން ދުވާލެއްގެ މައްޗަށް އުފައްދައިދޭނެ. އެއީ ހަމަ ރަނގަޅު ބެކްއަޕަކާ އެކީގައި،" ނިމާލް ވިދާޅުވި އެވެ.
ތިން ސަތޭކަ މެޓްރިކް ޓަނުގެ ފެން އުފައްދާ އައު ފެން ޕްލާންޓް، މި އަހަރުގެ އޯގަސްޓް މަސް ނިމުމުގެ ކުރިން އިންސްޓޯލްކޮށް، އޭގެ ޚިދުމަތް ތިނަދޫގެ ރައްޔިތުންނަށް ދޭން ފައްޓާނެ ކަމަށް ނިމާލް ވިދާޅުވި އެވެ.