22 Mar 2016, 11:26
ޕާކިސްތާނުގެ ކަރާޗީގައި ސެކިއުރިޓީ ގާޑަކު، 11 އަހަރުގެ ފިރިހެން ކުއްޖެއްގެ ގަޔަށް ބަޑި ޖަހައި، އޭނާ މަރާލައިފި އެވެ.
ކަރާޗީގެ ފުލުހުން ބުނާ ގޮތުގައި ސެކިއުރިޓީ ގާޑު، ކުއްޖާގެ ގަޔަށް ބަޑި ޖެހީ އެކުއްޖާ އޭނާ ސިއްސުވާލުމުންނެވެ. އެކުއްޖާ އެވަގުތު އައީ ބިރުވެރި ސޫރައެއްގެ މާސްކެއް މޫނުގައި އަޅައިގެންނެވެ.
ސެކިއުރިޓީ ގާޑު، ކުއްޖާގެ ގަޔަށް ބަޑި ޖެހުމާއި އެކު، އެކުއްޖާ ހޮސްޕިޓަލަށް ގެންދިޔަކަމަށް ވެއެވެ. އޭނާ މަރުވީ، ބަޑީގެ ވަޒަން ގަޔަށް އެރުމުގެ ސަބަބުން ލިބުނު ޒަޚަމްތަކަށް ހޮސްޕިޓަލުން ފަރުވާ ލިބިގަންނަމުން ދަނިކޮށެވެ.
އާދީއްތަ ދުވަހުގެ ރޭ ހިނގި މި ހާދިސާއާ ގުޅިގެން، މަރުވި ކުޑަ ކުއްޖާގެ އާއިލާއާއި އެސަރަހައްދުގައި ދިރިއުޅޭ ގިނަ އަދަދެއްގެ ބަޔަކު ވަނީ ނުރުހުން ފާޅުކޮށް، އަޑު އުފުލައިފަ އެވެ.
ޕާކިސްތާނުގައި ގިނަ އަދަދެއްގެ މީހުންނާއި ކުންފުނިތަކުން ޕްރައިވެޓް ސެކިއުރިޓީ ގާޑުން ގެންގުޅޭ ނަމަވެސް، މީގެ ތެރެއިން ގިނަ މީހުންނަކީ ރަނގަޅު ތަމްރީނެއް ދެވިފައިވާ ބައެއް ނޫންކަން ފާހަގަ ކުރެވެ އެވެ.
މަސްދަރު:ބީބީސީ