17 Mar 2016, 16:02
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފް ގޭބަންދުން ދޫކޮށްލައިފިއެވެ.
ފުލުހުން މަހުލޫފް ހައްޔަރުކުރީ މިދިޔަ ހުކުރު ދުވަހު އިދިކޮޅު އެމްޑީޕީން މާލޭގައި ކުރި މުޒާހަރާއާ ގުޅިގެންނެވެ.
އޭނާ ހައްޔަރުކުރުމަށްފަހު ފުލުހުންގެ ރަސްމީ ޓްވިޓާ އެކައުންޓުން ކުރި ޓްވީޓެއްގައި ވަނީ މަހުލޫފް ހައްޔަރުކުރީ ފުލުހަކަށް ހަމަލާދީގެން ކަމަށެވެ.
ނަމަވެސް ޖެހިގެންއައިދުވަހު މަހުލޫފްގެ ބަންދާމެދު ގޮތެއް ނިންމަން ކޯޓަށް ހާޒިރުކޮށް ބޭއްވި މުއްދަތު މަޖިލީހުގައި ފުލުހުން ބުނީ އޭނާ ހައްޔަރުކުރީ ކުށެއްގެ ތުހުމަތުގައިވާ މީހަކު ފިލުވި ކަމުގެ ތުހުމަތުގައި ކަމަށެވެ.
މިއަދު ކްރިމިނަލް ކޯޓުން މަހުލޫފް ދޫކޮށްލަން އަމުރު ނެރުމާ އެކު ނޫސްވެރިންނަށް މައުލޫމާތު ދެއްވަމުން މަހުލޫފް ވިދާޅުވީ އޭނާ ފުލުހަކަށް ހަމަލާދިން ކަމުގެ އެއްވެސް ހެއްކެއް ދެއްކެން ނޯންނާނެ ކަމަށެވެ.
ހަމައެހެންމެ ކުށެއްގެ ތުހުމަތުގައިވާ މީހަކު އޭނާ ފިލުވި ކަމުގެ އެއްވެސް ހެއްކެއް ދެއްކެން ނޯންނާނެ ކަމަށާއި އެފަަދަ އެއްވެސް ކަމެއް އޭނާ ކޮށްފައިނުވާނެ ކަމަށް މަހުލޫފް ވިދާޅުވިއެވެ.
"އެދުވަހު ކަންތައް ގޯސްވީ ފުލުހަކު އެއްވެސް ކަމަކާ ނުލައި މީހުންގެ މޫނަށް ޕެޕަސްޕްރޭޖެހުމުން. އަޅުގަނޑު ފުލުހަކަށް ހަމަލާދީފައިނުވާނެ. އެފަދަ އެއްވެސް ހެއްކެއްް ދެއްކޭކަށް ނޯންނާނެ. ދެން މިވިދާޅުވަނީ އަޅުގަނޑު މީހަކު ފިލުވީއޭ. އަޅުގަނޑު ނުދެނެހުރިން މުޒާހަރާގައި މީހަކު ފިލިކަން ވެސް،" މަހުލޫފް ވިދާޅުވިއެވެ.