17 Mar 2016, 11:27
ވޮލީ ބޯލް އެސޯސިއޭޝަން(ވީއޭއެމް)ގެ ރައީސަކު ހޮވުމަށް ބޭއްވި އިންތިހާބު ދެ ފަހަރު ވޯޓްލައިގެން ވެސް ނަތީޖާ އެއްވަރުވުމުން، އެގްޒެކެޓިވް ކޮމިޓީ(އެކްސްކޯ) މެމްބަރުންގެ މެދުގައި ނެގި ވޯޓު ކާމިޔާބް ކޮށްގެނެ ތިނަ ވަނަ ދައުރަކަށް މުހައްމަދު ރިޒާ (ރިޔާ) އިންތިހާބު ވެއްޖެއެވެ. އެ އެސޯސިއޭޝަންގެ ނައިބު ރައީސަކަށް އިންތިހާބުވީ އިލިޔާސް ވަހީދު (އިއްލަ) އެވެ.
ސްޓެލްކޯ ސެމިނާ ރޫމްގައި މިއަދު ހެނދުނު ކުރިއަށް ދިޔަ 2016 ވަނަ އަހަރުގެ އަހަރީ އާންމު ޖަލްސާގައި ކުރިއަށްދިޔަ އެ އިންތިހާބުގައި ރިޔާ އާއި ވާދަކުރީ ޑީއާރުޕީގެ ލީޑަރު މުހައްމަދު ނަޝީދު (ކާނަލް) އެވެ. ނައިބްރައީސް ކަމަށް ވާދަކުރެއްވީ އިއްލަ އާއި އިއްޒަތު ވަހީދެވެ.
ވީއޭއެމްގެ ރައީސަކު ހޮވުމަށް ބޭއްވި އިންތިހާބް ދެ ފަހަރު ވޯޓްލައިގެން ވެސް ނަތީޖާ އެއްވަރުވުމުން، އެކްސްކޯ މެމްބަރުންގެ މެދުގައި ނެގި ވޯޓުގައި މެމްބަރުން ރިޔާ އަށް ފެންނަކަމަށް އަތް ހިއްލާލައިގެން --- ސަން ފޮޓޯ: ފަޔާޒު މޫސާ
ވޯޓްލުން ފެށުމުގެ ކުރިން އިންތިހާބުން ނާކާމިޔާބުވެ ވަޑައިގެން ކާނަލް ވަނީ ގަވާއިދާ ހިލާފަށް ބައެއް ކްލަބްތަކަށް މެމްބާޝިޕް ދީފައިވާ ކަމަށާއި ސިފައިންގެ ކްލަބަށް ވޯޓުގައި ބައިވެރިވުމުގެ ފުރުސަތު ނުދިން ކަމަށް ބުނެ ޝަކުވާ ހުށަހަޅާފަ އެވެ. ނަމަވެސް ރިޔާސަތުގައި އިންނެވެ ރިޔާ ވަނީ ވޯޓް ކުރިއަށްދާ ގަޑީގައި ޝަކުވާ ހުށަނޭޅޭނެ ކަމަށް ބުނެފަ އެވެ.
ޖުމްލަ 16 ޓީމަކަށް ވޯޓް ލުމުގެ ހައްގު އޮތް އެ އިންތިހާބްގެ ވޯޓުގެ ދެ ބުރުގައި ވެސް ކޮންމެ ކެނޑިޑޭޓަކަށް ލިބިލެއްވީ އަށް ވޯޓެވެ. އެހެން ކަމުން އަސާސީ ގަވައުދުގައިވާ ގޮތުން ރައީސް އާއި ނައިބް ރައީސް އިންތިހާބްކުރުމަށް ވަނީ އެކްސްކޯގައި ވޯޓަށް އަހާފަ އެވެ. އެ ވޯޓްގެ އަގުލަބިއްޔަތުން ރިޔާ އާއި އިއްލަ ވަނީ އިންތިހާބް ކާމިޔާބު ކޮށްފައެވެ.
ވީއޭއެމްގެ ރައީސަކު ހޮވުމަށް ބޭއްވި އިންތިހާބްގައި ރިޔާ ވޯޓް ލައްވަނީ --- ސަން ފޮޓޯ: ފަޔާޒު މޫސާ
ރައީސާއި ނައިބްގެ އިތުރުން ހަޒާންދާރަކަށް ކުރިން ވެސް އެ މަގާމުގައި ހުރި އަހުމަދު ހުސެއިން (ކުޑަދޮނާ) 16 ވޯޓާ އެކު ހޮވުނު އިރު ބީޗް ވޮލީބޯޅަ ކޮމިޝަނަށް ކުރިމަތިލެއްވި މުހުޒާތު މުހައްމަދު އަދި އަހުމަދު އިބްރާހިމް ވެސް ވަނީ 16 ވޯޓާ އެކު އެ މަގާމަށް ހޮވިފަ އެވެ.
އެ ޖަލްސާގައި އިންތިހާބު ކުރި އެހެން މަގާމް ތަކަށް ބަލާއިރު ރޫލް ކޮމިޝަނަށް ތިން މެމްބަރަކު އިންތިހާބު ކުރިއިރު ޓެކްނިކަލް ކޮމިޝަނަށް ވެސް ވަނީ ތިން މެމްބަރުން އިންތިހާބްކޮށްފަ އެވެ. މީގެ އިތުރުން މިއަހަރަށް ކަނޑައަޅާފައިވާ ކުޅީވަރު މުބާރަތް ތަކުގެ މައުލޫމާތު މެމްބަރުންނަށް ދިން އިރު 2016 ވަނަ އަހަރުގެ ބަޖެޓް ވެސް ވަނީ ފާސްކޮށްފައެވެ
ވީއޭއެމްގެ މިއަދުގެ އިންތިހާބް ކުރިއަށް ގެންގޮސްފައި ވަނީ ޔޫތު މިންސްޓްރީން ކަނޑައަޅުއްވާފައިވާ ބޭފުޅަކާއި މީއޭއެމްގެ އެކްސްކޯގެ މެމްބަރެއްގެ ބެލުމުގެ ދަަށުން މީޑިއާގެ ވެސް ހާޒިރުގައެވެ.