ތިނަދޫ އިންޖީނުގޭގައި ރޯވި މައްސަލާގައި ހައްޔަރުގައި މީހާގެ ބަންދުގެ މުއްދަތު އިތުރުކޮށްފި

15 Mar 2016, 10:10

ގދ. ތިނަދޫ އިންޖީނުގޭގައި ހިނގި އަލިފާނުގެ ހާދިސާއާ ގުޅިގެން މިދިޔަ މަހުގެ 27 ވަނަ ދުވަހުގެ ރޭ ފުލުހުން ހައްޔަރު ކުރި މީހާގެ ބަންދުގެ މުއްދަތު އިތުރުކޮށްފި އެވެ. އޭނާއަކީ އެ މައްސަލާގައި މިހާރު ބަންދުގައި ހުރި ހަމައެކަނި މީހާ އެވެ.

ފުލުހުންގެ މީޑިއާ އޮފިޝަލަކު "ސަން" އަށް މިއަދު ވިދާޅުވީ އުމުރުން 40 އަހަރުގެ ދިވެހި ފިރިހެން މީހާގެ ބަންދުގެ މުއްދަތު އިތުރު ކުރީ އިއްޔެގައި ކަމަށެވެ. އޭނާގެ ބަންދަށް ކޯޓުން 10 ދުވަސް ޖަހާދީފައިވާ ކަމަށް ވެސް އޮފިޝަލު ވިދާޅުވި އެވެ.

އެ މައްސަލާގައި ފުލުހުން މީގެ ކުރިން ހައްޔަރުކޮށްފައި ވަނީ ތިނަދޫ ފެނަކަ ބުރާންޗުގެ އެސިސްޓެންޓް މެނޭޖަރު އިބްރާހިމް އަހުމަދު އާއި އެ އިންޖީނުގޭ ޑުރައިވަރު މުހައްމަދު ޔާމީނެވެ. އެ ދެ މީހުން ވެސް މިހާރު ފުލުހުން ވަނީ ދޫކޮށްލާފަ އެވެ.