14 Mar 2016, 10:46
އަންކާރާ (މާޗް 14): ޓެރަރިޒަމް "ކުޑަކަކޫ މައްޗަށް ތިރިކުރެވޭނެ" ކަމަށް ތުރުކީގެ ރައީސް، ރަޖަބް ތައްޔިބު އުރުދުޣާން ވިދާޅުވެއްޖެ އެވެ.
ތުރުކީގެ ވެރިރަށް އަންކާރާގައި ރޭ ދިން ޖާނުން ފިދާވުމުގެ ބޮމުގެ ހަމަލާއެއްގައި 34 މީހަކު މަރުވުމާ ގުޅިގެން ވާހަކަފުޅު ދައްކަވަމުން ރައީސް އުރުދުޣާން ވިދާޅުވީ އެހަމަލާގެ ސަބަބުން އެގައުމުގެ ސަލާމަތީ ފައުޖުތަކުގެ ހިތްވަރު އިތުރަށް ވަރުގަދަ ވާނެ ކަމަށެވެ.
ރައީސް އުރުދުޣާން ވިދާޅުވީ ޓެރަރިސްޓު ގުރޫޕުތަކުން އާއްމުންނަށް ހަމަލާދެނީ އެގައުމުގެ ސަލާމަތީ ފައުޖުތަކާ ދެކޮޅަށް ކުރާ ހަނގުރާމައިގައި ނާކާމިޔާބުވާން ފެށުމުން ކަމަށާއި މުސްތަގުބަލުގައި އެފަދަ ހަމަލާތަކުން ދިފާއުވާނެ ކަމަށެވެ. އަދި ގައުމުގެ އެއްބައިވަންތަކަމަށް ވެސް ރައީސް ގޮވާލެއްވި އެވެ.
"ޓެރަރިޒަމްއާ ދެކޮޅަށް ކުރާ މަސައްކަތް ކާމިޔާބު ވާނެ އަދި ޓެރަރިޒަމް ކުޑަ ކަކޫ މައްޗަށް ތިރިކުރެވޭނެ. ގައުމުގެ ރައްޔިތުން ކަންބޮޑުވާކަށް ނުޖެހޭ،" އުރުދުޣާން ވިދާޅުވި އެވެ.
މިސްރުގެ އިންޓީރިއާ މިނިސްޓަރު، އިފްކަން އަލާ ވަނީ އެހާދިސާގެ ތަހުގީގުތައް މިއަދު ނިމޭނެ ކަމަށާއި، ހަމަލާގައި ޒިންމާވާ ފަރާތްތައް މިއަދު ހާމަކުރައްވާނެ ކަމަށް ވިދާޅުވެފަ އެވެ.
ސަތޭކަފަންސަވީސް މީހަކު ޒަހަމްވި އެހަމަލާގެ ޒިންމާ އަދި އެއްވެސް ޖަމާއަތަކުން ނަގާފައި ނުވެ އެވެ. ނަމަވެސް ސަރުކާރުގެ ބައެއް ފަރާތްތަކުން ތުހުމަތު ކުރާ ގޮތުގައި ހަމަލާ ދިނީ ކުރުދިޝް ވޯކާސް ޕާޓީ (ޕީކޭކޭ) އިންނެވެ. ފަހަކަށް އައިސް ޕީކޭކޭ އާއި އައިއެސް އިން ވެސް ވަނީ ތުރުކީގެ އެކި ސަރަހައްދުތަކަށް ހަމަލާތައް ދީފަ އެވެ. (ބީބީސީ)