08 Mar 2016, 16:25
"ކޮމިއުނިކޭޝަންސް އޮތޯރިޓީ އޮފް މޯލްޑިވްސް" ގެ ނަމުގައި ސަރުކާރުގެ އިދާރާއެއް ރައީސް އަބްދުﷲ ޔާމީން މިއަދު އުފައްދަވައިފި އެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާ އަށް ލިބިވަޑައިގަންނަވާ އިހްތިޔާރުގެ ދަށުން، މިއަދު އުފެއްދެވި އިދާރާ ހިނގާނީ މިނިސްޓްރީ އޮފް ހޯމް އެފެއާޒުގެ ދަށުން ކަމަށް ރައީސް އޮފީހުން ބުނެ އެވެ.
އެ އިދާރާ އުފެއްދެވުމާ އެކީ "ކޮމިއުނިކޭޝަން އޮތޯރިޓީ އޮފް މޯލްޑިވްސް" މިއަދު ވަނީ އުވާލައްވާފަ އެވެ.
ކޮމިއުނިކޭޝަންސް އޮތޯރިޓީ އިން ކުރުމަށް ހަވާލުކޮށްފައި ވަނީ ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ގާނޫނުގައި ބަޔާންކޮށްފައިވާ ޓެލެކޮމިއުނިކޭޝަންގެ މަސައްކަތްތަކާއި، ސްޕެކްޓްރަމް ބެލެހެއްޓުމުގެ މަސައްކަތްތަކާއި، ޕޯސްޓުގެ ދާއިރާ ބެލެހެއްޓުމުގެ މަސައްކަތްތަކާއި، އިންފޯކޮމިއުނިކޭޝަންގެ ދާއިރާއާ ގުޅޭގޮތުން ޓެލެކޮމިއުނިކޭޝަންގެ ދާއިރާއާ ސީދާ ގުޅޭކަންކަމުގައި އިންފޯކޮމިއުނިކޭޝަންގެ ދާއިރާ ރެގިއުލޭޓްކުރުމަށް ބޭނުންވާ ނިސްބަތަށް ކުރަންޖެހޭ މަސައްކަތްތަކާއި، އެ ގާނޫނުގެ ދަށުން ނުވަތަ އެހެން ގާނޫނަކުން އެ އޮތޯރިޓީން ކުރަންޖެހޭނެ ކަމަށް ބަޔާންކުރާ މަސައްކަތްތަކެވެ.
އޭގެ އިތުރުން ގާނޫނުގެ ދަށުން ކޮމިއުނިކޭޝަންސް އޮތޯރިޓީ އޮފް މޯލްޑިވްސްއާ ހވާލުކޮށްފައިވާ މަސައްކަތްތައް ކުރުމަށްޓަކައި ނުވަތަ ކުރުމަށް މަގުފަހިކުރުމަށްޓަކައި ކުރަންޖެހޭ މަސައްކަތްތަކާއި، މިނޫންވެސް އެ ގާނޫނު ހިންގުމަށްޓަކައި ކުރަންޖެހޭ ކަންކަން ދެން ކުރާނީ މިއަދު އުފެއްދެވި ކޮމިއުނިކޭޝަންސް އޮތޯރިޓީ އޮފް މޯލްޑިވްސް އިން ނެވެ.