06 Mar 2016, 20:36
ބ. އަތޮޅު ތައުލީމީ މަރުކަޒުގައި ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ކުރިއަށް ގެންދާ، ކުލުނުހިޔާގައި ކިޔަވާދިނުމަށް ބޭނުންވާ މުހިންމު ވަސީލަތްތަކެއް ދިރާގުގެ ފަރާތުން ހަދިޔާ ކޮށްފި އެވެ.
ބ. އަތޮޅު ތައުލީމީ މަރުކަޒުގައި ބޭއްވި ހާއްސަ ހަފްލާއެއްގައި ދިރާގުގެ ފަރާތުން އެތަކެތި ހަވާލުކޮށްދެއްވީ ދިރާގުގެ ޑިރެކްޓާ ސޭލްސް އަލީ ރިޔާޒެވެ.
ދިރާގުގެ ފަރާތުން ހަދިޔާކުރި ތަކެތީގެ ތެރޭގައި ކޮމްޕިއުޓަރ ސިސްޓަމް، އައިޕެޑް، ތެރެޕީ ބޯލްސް، ބައިސިކަލް، ވުޑަން ޓޯއިސް ، ބޯލް ޕޫލް، ވޯޓަރ ޕޫލް، ކުޅޭ ތަކެތި، ފޮތް އަދި ފްލޯ މެޓްސްގެ އިތުރުން، ބީން ބޭގް ފަދަ ތަކެތި ހިމެނެއެވެ.
އެ ސެންޓަރުގައި ތަފާތު އެކި ނުކުޅެދުންތެރިކަން ހުންނަ 12 ވަރަކަށް ކުދިން ރަޖިސްޓްރީކޮށްގެން މިހާރުވެސް ހިދުމަތް ދެމުންދާއިރު، އެ ކުދިންނަށް ކިޔަވައިދިނުމުގައި މިހާރު ހަރަކާތްތެރިވަމުން ދަނީ ދެ ދާއިމީ ޓީޗަރުންގެ އިތުރަށް އެއް ލީޑިން ޓީޗަރެވެ.
ބ. އަތޮޅު ތައުލީމީ މަރުކަޒުގައި ދިރާގުން ބޭއްވި ރަސްމިއްޔާތުގެ ތެރެއިން ---- ފޮޓޯ/ ދިރާގު
ދިރާގުން ބުނީ އެ ކުންފުނީގެ ފަރާތުން މިއަދު ހަދިޔާކުރި ތަކެއްޗަކީ އެ ސެންޓަރު ހިންގުމަށް މިވަގުތު ވަރަށް ބޮޑަށް ބޭނުންވެފައިވާ ވަސީލަތްތަކެއް ކަމަށެވެ. އަދި އެ ތަކެއްޗަކީ އެ ކުދިންނަށް ކިޔަވައިދިނުމުގައި ވަރަށް މުހިންމު ރޯލެއް އަދާކުރާނެ ވަސީލަތްތަކެއް ކަމަށެވެ.
ބ.އަތޮޅު ތައުލީމީ މަރުކަޒުގެ ޑެޕިއުޓީ ޕްރިންސިޕަލް އަލީ އިމާދު ވިދާޅުވީ މިއަދާއި ހަމަޔަށްވެސް އެ ކްލާސްތައް ކުރިޔަށް ގެންދަމުން އައީ ތަފާތު ތެރަޕީތަކާއި ހުނަރުތައް ކުރިއެރުވުމަށް ބޭނުންވާ އެންމެ އެކަށީގެންވާ ވަސީލަތްތައް ނެތިކަމަށެވެ.
"ނަމަވެސް މިއަދު ދިރާގުގެ ފަރާތުން މި ވެދެއްވި އެހީތެރިކަމާއިއެކު މި ކްލާހަށް މި ލިބިގެން މިދިޔައީ ވަރަށް ބޮޑު ފުރިހަމަކަމެއް. އަޅުގަނޑުމެންގެ މި ކްލާސް، ކައިރި މުސްތަގުބަލެއްގައި ވަކި ޔުނިޓެއްގެ ގޮތުގައި ވަކިކުރެވިގެންދިޔުމަށް ރޭވިފައިވާއިރު، މި ލިބިގެން ދިޔަ ވަސީލަތްތަކާއިއެކު ވަރަށް ފުރިހަމަ ސެޓަޕެއް އަޅުގަނޑުމެންނަށް ޤާއިމުކުރެވިގެންދާނެ،" އަލީ އިމާދު ވިދާޅުވި އެވެ.
ބ. އަތޮޅު ތައުލީމީ މަރުކަޒުގައި ދިރާގުން ބޭއްވި ރަސްމިއްޔާތުގެ ތެރެއިން ---- ފޮޓޯ/ ދިރާގު
ކުޑަކުދިން ހިމާޔަތްކުރުމާއި އެހީތެރިވުމަކީ ދިރާގުގެ އިޖްތިމާއީ ޒިންމާގެ ވަރަށް މުހިންމު ދާއިރާއަކަށްވާއިރު އެ ކަމަކީ އިޖުތިމާއީ ޒިންމާގެ ދަށުން ކުރި ވަރަށް މުހިންމު ކަމެއް ކަމަށް އެ ކުންފުނިން މައުލޫމާތުދެ އެވެ.
ދިރާގުން ވަނީ މިދިޔަ އަހަރުގެ ނޮވެމްބަރު މަހުގެ ތެރޭގައި، ސ.ހިތަދޫ އަލް-ނޫރު ސެންޓަރުގެ ހާއްސައެހީއަށް ބޭނުންވާ ކުދިންނަށް 100،000 ރުފިޔާ ގެ ތަކެތި ހަދިޔާކޮށްފައެވެ. ކޮންމެ އަހަރަކު ދިރާގުން ބާއްވަމުން އަންނަ ދިރާގު ސްޕެޝަލް ސްޕޯރޓްސް ފެސްޓިވަލަކީވެސް، ހާއްސައެހީއަށް ބޭނުންވާ ކުދިންނަށް ހާއްސަކުރެވިގެން ބޭއްވޭ އެފަދަ އެންމެ ބޮޑު ހަރަކާތެވެ.