05 Mar 2016, 14:49
ށ. އަތޮޅު ނޫމަރާގައި ހަތަރު އަހަރުގެ ފާތިމަތު ޝައިހާ މަރާލި ކަމަށް ތުހުމަތުކޮށް ފުލުހުން ހައްޔަރު ކުރި، އެ ކުއްޖާގެ މަންމަގެ ބަންދުގެ މުއްދަތު އިތުރު 15 ދުވަސް ޖަހައިފި އެވެ.
ފުލުހުންގެ މީޑިއާ އޮފިޝަލް މިއަދު ސަން އަށް ވިދާޅުވީ ޝައިހާ މަރާލި މައްސަލާގައި ހައްޔަރުކުރި، 29 އަހަރުގެ މަންމަ، ޝަހީދާ އަލީގެ ބަންދަށް މިދިޔަ މަހުގެ 26 ވަނަ ދުވަހު 15 ދުވަސް އިތުރުކޮށްދީފައިވާ ކަމަށެވެ.
ޝަހީދާ ބަންދު ކުރީ މިިދިޔަ މަހުގެ 11 ވަނަ ދުވަހު އެވެ. އަދި ކުރިން އެއް ފަހަރު ވަނީ އޭނާގެ ބަންދަށް 15 ދުވަސް ޖަހައިފަ އެވެ.
އެ ކުއްޖާ މަރާލާފައި ވަނީ، ކަރަށާއި އަތުގެ ކޮނޑުހުޅު ކައިރި އަށް ވަޅި ހަރައިގެން ކަމަށް ތުހުމަތު ކުރެވެ އެވެ. އަދި އެ ކުއްޖާ މަރާލާފައި އޮތްކަން އެނގުނީ އެ ކުއްޖާގެ ކާފަ ފަތިސް ނަމާދަށް ހޭލުމަށް ފަހު، ކުއްޖާ އާއި މަންމަ ނިދާފައި އޮތް ކޮޓަރި އަށް ވަދެ ބެލުމުން ކަމަށް ނޫމަރާ ކައުންސިލުން އޭރު ބުންޏެވެ. އަދި އެ ދެމައިން އެކަނި ނިދަން ތިބި ކޮޓަރީގައި ހިނގި އެ ހާދިސާގައި އެ ކުއްޖާ މަރުވެފައި ވަނީ ހަށިގަނޑަށް ލިބުނު ޒަހަމުތަކުގައި ގައިން ލޭފައިބައި ހުސްވެގެން ކަމަށް ބެލެވޭ ކަމަށް ވެސް އޭރު ބައެއް މަސްދަރުތަކުން ބުންޏެވެ.
އެ ރަށު ކައުންސިލުން ބުނީ ޝަހީދާ އަލީއަކީ ނަފުސާނީ މައްސަލައެއް ހުންނަ މީހެއް ކަމަށެވެ.