29 Feb 2016, 13:18
ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ހައްޔަރު ކުރުމަށް ސައްޚަ ނޫން ކޯޓު އަމުރެއް ތައްޔާރުކުރި ކަމަށް ތުހުމަތު ކުރެވޭ އދ. މާމިގިލީ ކޯޓުގެ އިސް މެޖިސްޓްރޭޓް، ގއ. މާމެންދޫ، ވީނަސް، އަހްމަދު ނިހާންގެ ބަންދަށް އަނެއްކާވެސް ހަތް ދުވަސް އިތުރުކޮށްފިއެވެ.
މިއީ އޭނާގެ ބަންދުގެ މުއްދަތު ހައިކޯޓުން އިތުރުކުރި ތިން ވަނަ ފަހަރެވެ. ނިހާން ހައްޔަރުކޮށްފައި ވަނީ މިމަހުގެ ހަތް ވަނަ ދުވަހުގެ ރޭގެ ވަގުތެއްގައެވެ.
ސައްޚަ ނޫން ކޯޓު އަމުރު ތައްޔާރުކުރަން ބައިވެރިވި ކަމުގެ ތުހުމަތުގައި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިން ވެސް ވަނީ ހައްޔަރުކޮށްފައެވެ.
އެ މައްސަލާގައި ކުރީގެ ރައީސް މުހައްމަދު ނަޝީދުގެ މައްޗަށް ވެސް ތުހުމަތު ކުރެވެއެވެ.
ފުލުހުން ބުނެފައި ވަނީ ރައީސް ޔާމީން ހައްޔަރުކުރުމަށް ކޯޓު އަމުރެއް ނެރެފައިވާ ކަމާއި އެހެންކަމުން އެކޯޓު އަމުރާ އެއްގޮތަށް ރައީސް ޔާމީން ހައްޔަރުކުރުމަށް ބާރު އަޅުއްވައި ރައީސް ނަޝީދު ސިފައިންގެ އިސް އޮފިސަރަކަށް ގުޅުއްވާފައިވާ ކަމަށެވެ.
ބްރިގޭޑިއާ ޖެނެރަލް ޒަކަރިއްޔާ މަންސޫރަށް ގުޅުއްވައި އެކަމާ ގުޅޭގޮތުން ވާހަކަދެއްކެވި ކަމަށް ރައީސް ނަޝީދު ވެސް ވަނީ އިއުތިރާފުވެވަޑައިގެންފައެވެ.