25 Feb 2016, 10:04
ރައީސުލްޖުމްހޫރިއްޔާ ޢަބުދުﷲ ޔާމީނު ޢަބުދުލް ޤައްޔޫމަށް ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފު ހިތްވަރުދެއްވައިފި އެވެ.
ޕާކިސްތާނުގެ ނޫހެއް ކަމަށްވާ އެސޯސިއޭޓެޑް ޕްރެސް އޮފް ޕާކިސްތާނު (އޭޕީޕީ) އިން ބުނީ އެގައުމުގެ ބޮޑުވަޒީރު ނަވާޒް ޝަރީފު އިއްޔެގައި ރައީސް ޔާމީނާ ފޯނުން ގުޅުއްވައިގެން ވާހަކަފުޅު ދެއްވި ކަމަށެވެ. "ހަގީގީ ޑިމޮކްރަސީ އާއި ހަރުދަނާ ޑިމޮކްރަޓިކް މުއައްސަސާތައް އުފެއްދުމަށް ކުރާ މަސައްކަތުގައި ދިވެހި ސަރުކާރާއި ރައްޔިތުންނަށް ތާއީދުކުރައްވާނެ ކަމަށް" ރައީސް ޔާމީނާއި ދެއްކެވި ވާހަކަފުޅުގައި ޝަރީފު ވިދާޅުވި ކަމަށް ނޫހުގައިވެ އެވެ.
ޕާކިސްތާނުގެ ބޮޑުވަޒީރު ނަވާޒް ޝަރީފު ރައީސް ޔާމީނަށް ގުޅުއްވީ ކޮން ކަމަކާއި ގުޅިގެން ކަމެއް އެނޫހަކުން ނުބުނެ އެވެ.
ޕާކިސްތާނާއި ރާއްޖެއާ ދެމެދު އޮންނަ ގުޅުން ފަހަކަށް އައިސް ވަނީ ބަދަހިވާން ފަށާފަ އެވެ. ޕާކިސްތާނުގެ ބޮޑުވަޒީރު ނަވާސް ޝަރީފުގެ ދައުވަތަކަށް ރައީސް ޔާމީނު މިދިޔަ އަހަރު މޭ މަހު އެގައުމަށް ރަސްމީ ދަތުރުފުޅެއް ކުރެއްވި އެވެ.