24 Feb 2016, 22:04
އޭއެފްސީ ކަޕުގައި އިންޑިއާގެ މޯހަން ބާގަން އަތުން 5-2ގެ ނަތީޖާ އަކުން ބަލިވެ މި ސީޒަނުގައި މާޒިޔާ ކުޅުނު ފުރަތަމަ މެޗުން ބޮޑު ތަފާތަކުން ބަލިވެއްޖެ އެވެ.
އިންޑިއާގެ އިންދިރާ ގާންދީ އެތުލެޓިކް ސްޓޭޑިއަމްގައި ކުޅުނު އެ މެޗުގެ ފުރަތަމަ ހާފުގައި މޯހަން ބަގާން އިން ވަނީ ތިން ގޯލުގެ ލީޑެއް ނަގާފަ އެވެ. އެ ގޮތުން ފުރަތަމަ ހާފުގައި އެ ޓީމުގެ ގޯލުތައް ކާމިޔާބުކޮށް ދިނީ ސޮނީ ނޯޑީ އާއި ޖޭޖޭ ލާލުޕަކްލާގެ އިތުރުން ގެލާންނެވެ.
ފުރަތަމަ ހާފު ބޮޑު ލީޑެއްގައި އޮވެ މޯހަން އިން ނިއްމާލިއިރު ދެވަނަ ހާފުގައި މާޒިޔާއިން ވަނީ އެ މީހުންގެ ކުޅުން ރަނގަޅުކޮށް މޯހަންގެ ގޯލަށް ނުރައްކާކޮށްފަ އެވެ. އެގޮތުން ދެވަނަ ހާފު ފެށިގެން މާޒިޔާގެ އިސްމާއިލް އީސަ ތަނަވަސްކޮށް ދިން ފުރުސަތަކުން އަހުމަދު އިމާޒު ވަނީ މާޒިޔާއަށް ގޯލެއް ކާމިޔާބު ކޮށްދީފައެވެ.
މާޒިޔާގެ އެ ގޯލަށްފަހު އެ ޓީމުން ރަނގަޅު ކުޅުމެއް ދެއްކި ނަމަވެސް އިންޑިއާ ލީގުގެ އެންމެ ފަހުގެ ޗެމްޕިއަން މޯހަން އިން ވަނީ ކައިރި ކައިރީގައި ދެ ގޯލު ކާމިޔާބުކޮށް އެމީހުންގެ ލީޑް އިތުރަށްފުޅާ ކޮށްފައެވެ. އެ ދެ ގޯލު މޯހަން އަށް ކާމިޔާބު ކޮށްދިނީ އެ ޓީމުގެ ދެވަނަ އަދި ތިން ވަނަ ގޯލު ވެސް ކާމިޔާބު ކޮށްދިން ޖޭޖޭ އާއި ގެލާންއެވެ.
މާޒިޔާގެ ފަހު ގޯލަކީ މިދިޔަ ސީޒަނުގައި ގިނަ ދުވަސް ތަކެއް އަނިޔާގެ ސަބަބުން ގިނަ މެޗުތަކެއް ނުކުޅެ ހުރެ ބަދަލު ކުޅުންތެރިއެއްގެ ގޮތުގައި މިރޭގެ މެޗުގައި ކުޅުން ނިކުއިން ހުސެން ނިޔާޒް (ބޮކްރީ) ނަގައިދިން ހުރަހެއް ސާފުކޮށްލަން އުޅުމުގެ ތެރޭގައި މޯހަންގެ ރާޖް އަތުން ބައިކޮޅަށް ވަތް ގޯލެކެވެ.
މިދިޔަ ސީޒަނުގައި ޕަރެޒިޑެންޓް ކަޕް ކާމިޔާބްކޮށް މިއަހަރުގެ ސީޒަނަށް މޮޅުތި ގިނަ ކުޅުންތެރިންތަކަކާ އެކު ނިކުއިން މާޒިޔާ މިރޭގެ މެޗަށް ނުކުމެފައިވަނީ މުހިންމު ދެ ކުޅުންތެރިއަކާ ނުލަ އެވެ. އެއީ ޖިނާއީ ކުށެއްގެ ތުހުމަތުގައި ހުރި އިތުބާރު މިޑްފިލްޑަރު އަސްއަދު އަލީ (އަޑުބަރޭ) އާއި އަނިޔާގައި ހުރި މުހައްމަދު އުމައިރެވެ.
މާޒިޔާ ކުޅޭ ދެ ވަނަ މެޗުގައި ރާއްޖޭގައި ނުކުންނާނީ މިޔަންމާގެ ޔަންގޮން ޔުނައިޓެޑާ ދެކޮޅަށެވެ. އެ މުބާރާތުގައި ޔަންގޮން ކުޅުނު ފުރަތަމަ މެޗުގައި އެ ޓީމުގެ ދަނޑުގައި މިއަދު ޗައިނާގެ ސައުތު ޗައިނާ އަތުން ވަނީ 2-1ގެ ނަތީޖާ އަކުން މޮޅުވެފައެވެ.