24 Feb 2016, 15:14
ކްރިމިނަލް ކޯޓު ހިންގުމާ ހަވާލުވެވަޑައިގެން ހުންނެވި ގާޒީ، އަބްދުލް ބާރީ ޔޫސުފްގެ ފޮޓޯ ނަގައި އޭނާ އަށް އިންޒާރުދިން ކަމުގެ ތުހުމަތުގައި ހައްޔަރު ކުރި ގައުމީ ޓީމުގެ ކުޅުންތެރިޔާ އަސްއަދު އަލީ (އަޑުބަރޭ)ގެ ބަންދަށް ކްރިމިނަލް ކޯޓުން މިއަދު އަނެއްކާ ވެސް 10 ދުވަސް އިތުރުކޮށްފި އެވެ.
ކޯޓު އަމުރެއްގެ ދަށުން އަޑުބަރޭ ހައްޔަރުކޮށްފައި މިމަހުގެ 20 ވަނަ ދުވަހުގެ ރޭ ދަންވަރު 12:45 އެހާކަންހާ އިރު އަމީނީމަގު ހެޕީ މާކެޓު ކައިރިންނެވެ.
އަޑުބަރޭގެ ގާނޫނީ ވަކީލު އަބްދުﷲ ހަސީން ސަން އަށް ވިދާޅުވީ އޭނާ ހަނު ހުރުމުގެ ސަބަބުން ތަހުގީގަށް ބޭނުންވާ މައުލޫމާތު ލިބުމަށް ދަތިވެފައިވާ ކަމަށް ފުލުހުން މިއަދު މުއްދަތު މަޖިލީހުގައި ބުނި ކަމަށެވެ.
ގާޒީ ބާރީގެ ފޮޓޯއެއް ނަގައި އޭނާ އަށް އިންޒާރުދިން މައްސަލަ ތަހުގީގު ކުރަން ފުލުހުންނަށް ހުށަހަޅާފައި ވަނީ ކްރިމިނަލް ކޯޓުންނެވެ.
ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ ބާރީ ސޮއިކުރައްވައި ފުލުހުންނަށް ފޮނުވި ސިޓީއާ އެކު ފޮޓޯ ނެގި މީހާ ދުއްވި ސައިކަލް ނަންބަރު އަންގައިދޭ ފޮޓޯއެއް ފުލުހުންނަށް ފޮނުވާފައިވެ އެވެ.
"ކަލޭގެ ފޮޓޯއެއް ނަގަން އެބަޖެހޭ. ކަލޭމެން ގާޒީން ކަންތައް ކުރާގޮތް އަހަރެމެންނަށް އެނގޭ. ކަލޭމެން ހަދާއެއްޗެއް ހަދާށޭ. ތިމަންނަ ކަލޭގެ ފޮޓޯއެއް ނަގާނަމޭ،" ގާޒީ ބާރީއާ ދިމަލަށް އެމީހާ ބުނި ކަމަށް ކްރިމިނަލް ކޯޓުގެ ސިޓީގައި ބުނެފައިވެ އެވެ.
އެ ސިޓީގައި ގާޒީ ބާރީ އެދިވަޑައިގެންފައި ވަނީ ކޯޓުގެ ހުރުމަތް ރައްކާތެރިކުރުމާ ބެހޭ ގަވާއިދުގެ ދަށުން ނުވަތަ އެހެން ގާނޫނެއްގެ ދަށުން ވިޔަސް އެމީހާއާ މެދު ފިޔަވަޅު އަޅައިދިނުމަށެވެ.
އަޑުބަރޭ ހައްޔަރު ކުރުމުން އެމްޑީޕީ އިން ވަނީ އެކަން ކުށްވެރިކޮށް، އޭނާ ވަގުތުން ދޫކޮށްލުމަށް ގޮވާލާފަ އެވެ.