24 Feb 2016, 15:08
ދިރުވާލައިގެން 23 ބްލެޓު ހެރޮއިން ރާއްޖެ އެތެރެކުރަން އުޅުނު ދިވެހި ޒުވާނަކު ހައްޔަރުކޮށްފި އެވެ.
ކަސްޓަމްސް އިން މައުލޫމާތު ދިންގޮތުގައި މި މަހު 17 ވަނަ ދުވަހު ސްރީލަންކަން އެއާލައިންސް އިން ރާއްޖެ އައި 24 އަހަރުގެ އެ ދިވެހި ފިރިހެން މީހާ ހައްޔަރުކޮށްފައި ވަނީ ފުލުހުންގެ އިންޓެލިޖެންސްއަށް ލިބުނު މައުލޫމާތަކާއި ގުޅިގެން އޭނާގެ ހަށިގަނޑު ސްކޭންކޮށް ބެލިއިރު މަސްތުވާތަކެތި ފެނިފައިވާތީ ކަމަށެވެ.
ކަސްޓަމްސް އިން ބުނީ އޭނާގެ އެތެރެހަށީގައި ހެރޮއިން 23 ބުލެޓް ޕެކެޓް ރައްކާކޮށްފައިވާ ކަމަށެވެ. އެއީ 280000 ރުފިޔާގެ މަސްތުވާތަކެތި ކަމަށް ވެސް ކަސްޓަމްސްއިން ބުންޏެވެ.
މިމަހުގެ ތެރޭގައި މަސްތުވާތަކެތި ރާއްޖެ އެތެރެކުރަން އުޅުނު ތިން މައްސަލައެއްގައި ހިމެނޭ ބަޔަކު އަތުލައިގެންފައިވާ ކަމަށް ކަސްޓަމްސް އިން ބުންޏެވެ. އެގޮތުން އެކެއްގެ އެތެރެހަށީން 35 ބުލެޓް ހެރޮއިން އަތުލައިގެންފައިވާ އިރު އެހެން ފަރާތެއްގެ ފޮށިތަންމަތި ބަލައި ފާސްކުރުމުގެ ތެރެއިން 817 ގްރާމް ކެނަބިސް އަތުލައިގެންފައިވާ ކަމަށެވެ.
ކަސްޓަމްސް އިން ބުނީ އެ މައްސަލަތަކުގައި ހިމެނޭ މީހުންނާއި އެމީހުންގެ އަތުން އަތުލަގެފަިއވާ މަސްޓުވާތަކެތި ފުލުހުންނާއި ހަވާލުކޮށްފައިވާ ކަމަށެވެ.