23 Feb 2016, 11:12
ދަވްޙާ (ފެބްރުއަރީ 23) : ސޫރިޔާގެ ހަނގުރާމައިގެ ޙަމަލާތައް ހުއްޓާލުމަށް އެމެރިކާ އާއި ރަޝިޔާ އެއްބަސްވި އެއްބަސްވުން ގަބޫލުކުރެވޭނީ ބައިނަލްއަގްވާމީ ގެރެންޓީއަކާ އެކުގައި ކަމަށް ސޫރިޔާގެ އިދިކޮޅު ފަރާތްތަކުން ބުނެފި އެވެ.
ސޫރިޔާގެ އިދިކޮޅު ޖަމާއަތްތަކުގެ ފަރާތުން ވާހަކަ ދެއްކެވި ތަރްޖަމާން ރިޔާޒް ޙިޖާބު ވިދާޅުވީ ޙަމަލާތައް ހުއްޓާލުމަށް އެމެރިކާ އާއި ރަޝިޔާ އެއްބަސްވި އެއްބަސްވުން ސާފުނުވާކަމަށާއި އޭގެ ތަފްސީލް ވެސް އަދި ނުލިބޭ ކަމުގަ އެވެ. އަދި އެއެއްބަސްވުމާ އެއްގޮތަށް އިދިކޮޅު ޖަމާއަތްތަކުން ހަމަލާތައް ހުއްޓާލާނީ އެކަން އެގޮތުގައި ކުރިޔަށްދާނެ ކަމުގެ ބައިނަލްއަގްވާމީ ގެރެންޓީ އެއްލިބުމުން ކަމަށް ވެސް ހިޖާބު ވިދާޅުވި އެވެ. ސޫރިޔާގެ ހަނގުރާމައިގެ ޙަމަލާތައް ހުއްޓާލުމުގެ އެއްބަސްވުން އިޢްލާންކޮށްފައި ވަނީ އެމެރިކާ އާއި ރަޝިޔާގެ ރައީސުންގެ މަޝްވަރާތަކަށް ފަހު އެދެގައުމުގެ ޚާރިޖީ ވަޒީރުންނެވެ.
ޙަމަލާތައް ހުއްޓާލުމުގެ ޕްލޭން ބުނަނީ އެކަން ތަންފީޒުކުރަން ފަށާނީ އަންނަ ހޮނިހިރު ދުވަހުގެ ރޭގެ މެންދަމު ބާރަ ސުންމިނިއްޓުން ފެށިގެންކަމުގަ އެވެ. މިއެއްބަސްވުމަށް ސޫރިޔާ ސަރުކާރުންނާއި އިދިކޮޅު ފަރާތްތަކުން އަމލުކުރާނެ ކަމުގެ އުންމީދުއެބައޮތް ކަމަށް ވެސް އެމެރިކާ އާއި ރަޝިޔާގެ ޚާރިޖީ ވަޒީރުން ވަނީ ވިދާޅުވެފަ އެވެ. މިއެއްބަސްވުމާބެހޭ މައުލުމާތު ސޫރިޔާގެ ރަސްމީ މީޑީޔާއިން ގެނައި ނަމަވެސް އެއާމެދު ސޫރިޔާ ސަރުކާރުން ދެކޭގޮތް އަދި ހާމަކޮށްފައެއް ނުވެއެވެ.
ނަމަވެސް ރައީސް ބައްޝާރުލްއަސަދު ދާދިފަހުން ވަނީ ޝަރުތުތަކަކާ އެކު ޙަމަލާތައް ހުއްޓާލަން ތައްޔާރަށް ހުންނެވިކަމަށް ވިދާޅުވެ ވާހަކަ ދައްކަވާފަ އެވެ. ރަޝިޔާއަކީ ސޫރިޔާ ސަރުކާރުގެ ދިފާއުގައި މަސައްކަތްކުރާ ގައުމެއް ކަމަށްވާއިރު އެމެރިކާއަކީ ސޫރިޔާގެ އިދިކޮޅު ފަރާތްތަކަށް ހަތިޔާރާއި ފައިސާއިން ވާގިވެރިވާ ގައުމެކެވެ. ސޫރިޔާގެ ހަނގުރާމައިގެ ހަމަލާތައް ހުއްޓާލުމުގެ މިއެއްބަސްވުމުގެ ބޭނުމަކީ ހާލުގައި ޖެހިފައިވާ ފަރާތްތަކަށް އިންސާނީ އެހީ ފޯރުކޮށްދިނުމުގެ ފުރްސަތު ދިނުމާއި ޖެނީވާގައި ފެށުމަށް ހަމަޖެހިފައިވާ ސުލްޙައިގެ ވާހަކަތަކަށް މަގުފަހިކުރުން ކަމަށް އެމެރިކާއާއި ރަޝިޔާ އިން ބުނެ އެވެ. ސޫރިޔާގެ މައްސަލާގައި ނަގާކިޔާ ދެގައުމަކީ ދުނިޔޭގެ އެންމެ ބޮޑު އަސްކަރީ ދެބާރު ކަމަށްވާ އެމެރިކާއާއި ރަޝިޔާ އެވެ.
ސޫރިޔާގެ ހަނގުރާމައިގެ ހަމަލާތައް ހުއްޓާލުމުގެ މިއެއްބަސްވުމުގައި އެގައުމުގައި ހަރަކާތްތެރިވާ ޓެރަރިސްޓް ޖަމާއަތްތައް ހިމެނިފައެއް ނުވެ އެވެ. އައިއެސްއާއި ޖަބްހަތުއްނުސްރާ އާއި އެނޫން ވެސް ބައެއް ޖަމާއަތްތަކެވެ. އެޖަމާއަތްތަކާ ދެކޮޅަށްދޭ ހަމަލާތައް ކުރިޔަށްދާނެކަމަށް އެމެރިކާ އާއި ރަޝިޔާ އިން ބުނެ އެވެ. (ނޫސްއެޖެންސީތައް)