21 Feb 2016, 13:07
"ވަގު ޔަގީން" މިނަމުގައި މިދިޔަ ހުކުރު ދުވަހު އިދިކޮޅު އެމްޑީޕީން މާލޭގައި ބޭއްވި ހިނގާލުމުގެ ތެރެއިން ހައްޔަރުކުރި މީހާގެ ބަންދުގެ މުއްދަތު ފަސް ދުވަހަށް އިތުރުކޮށްފިއެވެ.
ފުލުހުންގެ މީޑިއާ އޮފިޝަލް ސަން އަށް ވިދާޅުވީ، ފުލުހުންގެ އަމުރަށް ނުކިޔަމަންތެރިވި މައްސަލާގައި ހައްޔަރުކުރި އެމީހާގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ފަސް ދުވަހުގެ މުއްދަތަށް އޭނާ ފުލުހުންގެ ބަންދުގައި ބެހެއްޓުމަށް އަމުރުކޮށްފައިވާ ކަމަށެވެ.
ހައްޔަރުކުރި މީހާގެ ވަނަވަރެއް ފުލުހުން ހާމަކޮށްފައެއް ނުވެއެވެ.
އެ ހިނގާލުމުގެ ތެރެއިން ފުލުހުން ހައްޔަރުކުރީ އެންމެ މީހެކެވެ. އެ ހިނގާލުން ފެށުމާ އެކު ފުލުހުން ވަނީ ހިނގާލުމަށް ހުރަސްއަޅައި ހިނގާލުން ހުއްޓުވައިފައެވެ.
ފުލުހުން ބުނީ އެ ހިނގާލުން ހުއްޓުވީ އެއްވުން ނުބޭއްވޭނެކަމަށް ފުލުހުން އަންގާފައިވަނިކޮށް ހިނގާލުން ކުރިއަށް ގެންގޮސްފައިވާތީ ކަމަށެވެ.