21 Feb 2016, 11:48
އަދާލަތު ޕާޓީގެ ރައީސް ޝައިޚު އިމްރާން ޢަބުދުﷲގެ މައްޗަށް އިއްވި 12 އަހަރުގެ ޖަލު ހުކުމަކީ ސަރުކާރުން ދައުލަތް ހިންގާ ގޮތާ ހިލާފުވެ، އެކަމާ ދެކޮޅަށް ތެދުވާ ދީނީ އިލްމުވެރިންނަށް ދިން އިންޒާރެއް ކަމަށް އެ ޕާޓީ އިން ބުނެފި އެވެ.
އެ ޕާޓީ އިން މިއަދު ނެރުނު ބަޔާނެއްގައި ބުނެފައި ވަނީ އިމްރާނުގެ މައްޗަށް ޓެރަރިޒަމްގެ ދައުވާ އުފުލައި، އިމްރާނަކީ ދީނީގޮތުން ހައްދުފަހަނަ އަޅާފައިވާ ބޭފުޅެއް ކަމަށް ސަރުކާރުން ބައިނަލްއަގުވާމީ ދުނިޔެ އަށް ދެއްކުމަށް މަސައްކަތް ކުރަމުން އަންނަ ކަމަށާއި އެކަން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.
އިމްރާންގެ މައްޗަށް ހުކުމް ކޮށްފައި ވަނީ އިސްލާމީ ޝަރީއާ އާއި ދިވެހި ގާނޫނު އަސާސީ އާއި ދިވެހި ރާއްޖެ އިން ބައިވެރިވެފައިވާ ބައިނަލްއަގުވާމީ މުއާހަދާތަކާ ހިލާފަށް ކަމަށާއި އެއީ ރާއްޖޭގެ ހުރިހާ އިދިކޮޅު ސިޔާސީ ލީޑަރުން ފަހަތަށް ޖެއްސުމަށް ކުރި ހުކުމެއް ކަމަށް އެ ޕާޓީ އިން ވަނީ ބުނެފަ އެވެ.
އަދާލަތު ޕާޓީ އިން ބުނީ މިހާރު ރާއްޖޭގައި ކަންކަން ހިނގަމުން އަންނަ ގޮތުން ގައުމު ވަރަށް ބޮޑަށް ފަހަތަށް ސޮއްސާލައިގެން ގޮސްފައިވާ ކަމަށާއި، ރައީސް ޔާމީނުގެ ސަރުކާރުން ހިންގަމުން އަންނަ ކޮރަޕްޝަނާއި އަނިޔާވެރިކަމާ ދެކޮޅަށް އަޑު އުފުލާ ކޮންމެ މީހަކަށް ވެސް އެފަދަ ހުކުމެއް އަންނާނެ ކަމުގެ އިންޒާރު ދެމުން އަންނަ ކަމަށެވެ.
"މިއީ ރައީސް ޔާމީންގެ ސަރުކާރުން ދައުލަތުގެ ފައިސާއަށް ހިޔާނާތްތެރިވެ ހިންގާފައިވާ ކޮރަޕްޝަނުގެ އަމަލުތަކާ ހުދުމުހުތާރު އަނިޔާވެރި އަމަލުތަކާ ދެކޮޅަށް އަޑުއުފުލާ ކޮންމެ މީހަކާ ދޭތެރޭ ވެސް ސަރުކާރުން އަމަލު ކުރާނެ ގޮތުގެ އިންޒާރެއް. އަދި ޝެއިހް އިމްރާނުގެ މައްޗަށް އުފުލި ދައުވާ އަކީ ހާއްސަކޮށް ސަރުކާރުގެ އަނިޔާވެރިކަމާ ދެކޮޅަށް ތެދުވާ ދީނީ އިލްމުވެރިންނަށް ދިން އިންޒާރެއް،" އެ ޕާޓީގެ ބަޔާނުގައިވެ އެވެ.
އަދާލަތު ޕާޓީ އިން ބުނީ އިމްރާނުގެ މައްޗަށް ހުކުމް ކުރި އިރު ދިފާއީ ހެކިން ހުށަހެޅުމުގެ ފުރުސަތެއް ދީފައިނުވާ ކަމަށާއި އެކަމުން ދޭހަވަނީ އެ ހުކުމަކީ ކުރިން ވެސް ލިޔެވިފައިވާ ހުކުމެއް ކަން ކަމަށެވެ. އަދި އެކަމުން ޝަރުއީ ދާއިރާ އަށް ސިޔާސީ ނުފޫޒު ފޯރާފައިވާ މިންވަރު ވެސް ވަރަށް ރަނގަޅަށް ހާމަވާކަމަށް އަދާލަތުގެ ބަޔާނުގައިވެ އެވެ.
އަދާލަތުން ބުނީ އިމްރާނު މިނިވަންކުރުމަށް ކުރަމުން އަންނަ މަސައްކަތް ހުއްޓާނުލާނެ ކަމަށާއި، ބައިނަލްއަގުވާމީ ފަރާތްތަކާ ގުޅުން ބަދަހިކޮށް އެ މަސައްކަތް އިތުރަށް ވަރުގަދަ ކުރާނެ ކަމަށެވެ.
އިމްރާން 12 އަހަރަށް ޖަލަށްލުމަށް ހުކުމް ކުރީ މިދިޔަ އަހަރުގެ މެއި މަހުގެ އެއްވަނަ ދުވަހު އަނިޔާވެރި ކަމަށް ހިތްވަރު ލިބޭ ގޮތަށް އިމްރާން ވާހަކަ ދެއްކި ކަމާއި އަދި އެ ދުވަހު ހިނގި ހުރިހާ ހަމަނުޖެހުމެއް ހިނގީ އިމްރާން އެގޮތަށް ވާހަކަ ދެއްކެވި ކަމުން ކަމަށް ޝަރީއަތަށް ގަބޫލުކުރެވޭތީ ކަމަށް ކްރިމިނަލް ކޯޓުން ރޭ އިއްވި ހުކުމްގައިވެ އެވެ.