18 Feb 2016, 10:51
ސްޕެނިޝް ލީގުގައި މެސީ ކާމިޔާބު ކުރި 300 ވަނަ ގޯލާ އެކު 3-1ގެ ނަތީޖާ އަކުން ސްޕޯޓިން ގިޖޯން ބަލިކޮށް ބާސެލޯނާ އިން ސްޕްނިސް ލީގު އެއް ވަނާގައި ހަ ޕޮއިންޓްގެ ލީޑެއް ނަގާފި އެވެ.
ރޭގެ އެ މޮޅާއެކު ބާސާ އޮތީ ކުޅުނު 24 މެޗުން 60 ޕޮއިންޓް ހޯދާއިގެން ތާވަލުގެ އެއްވަނާގައެވެ. ދެވަނާގައި އޮތް އެތުލެޓިކޯ މެޑްރިޑަށް 54 ޕޮއިންޓް ލިބުނު އިރު ތިން ވަނާގައި އޮތް ރެއާލް މެޑްރިޑަށް ލިބެނީ 53 ޕޮއިންޓެވެ.
ސްޕެނިސް ލީގްގައި ސްޕޯޓިންގް އާއި ބާސާ ކުޅުނު މެޗުގެ ތެރެއިން --- ފޮޓޯ: އޭޕީ
ސްޕޯޓިންގެ ދަނޑުގައި ކުޅުނު އެ މެޗުގެ 25 ވަނަ މިނެޓްގައި ލުއިސް ސުއަރޭޒް ތަނަވަސް ކޮށްދިން ފުރުސަތަކުން މެސީ ވަނީ ލީގުގައި އޭނާގެ 300 ވަނަ ގޯލު ކާމިޔާބުކޮށް ބާސާއަށް މެޗުގެ ލީޑު ހޯދަދީފަ އެވެ.
ބާސާ އިން ލީޑު ނެގިތާ ދެ މިނެޓް ފަހުން ސްޕޯޓިންގް އިން ވަނީ ގޯލެއް ކާމިޔާބުކޮށް ނަތީހާ އެއްވަރު ކޮށްފައެވެ. އެ ގޯލު ސްޕޯޓިންއަށް ކާމިޔާބުކޮށް ދިނީ ކާލޯސް ކާސްޓްރޯ އެވެ. ނަމަވެސް ފުރަތަމަ ހާފު ނިމުމުގެ ކުރިން މެސީގެ ގޯލުން ބާސާ އަށް ވަނީ އެ މެޗުގައި ދެވަނަ ފަހަރަށް ލީޑް ލިބިގެން ގޮސްފަ އެވެ.
ސްޕެނިސް ލީގުގައި ސްޕޯޓިންގް އާއި ބާސާ ކުޅުނު މެޗުގެ ތެރެއިން --- ފޮޓޯ: އޭޕީ
ދެވަނަ ހާފް ފެށިގެން ބާސާ އަށް ލީޑު ފުޅާ ކުރިން ލިބުނު ޕެނަލްޓީ ސުއަރޭޒް ފޮނުވާލި ނަމަވެސް ސްޕޯޓިންގެ ކީޕަރު ވަނީ ދިފާއު ކޮށްފައެވެ. ޕެންލްޓީ ކާމިޔާބް ނުކުރެވުނު ނަމަވެސް މެޗުގެ 67 ވަނަ މިނެޓްގައި ސުއަރޭޒް ވަނީ ގޯލެއް ކާމިޔާބުކޮށް ބާސާގެ ލީޑު އިތުރަށް ފުޅާކޮށްދީފަ އެވެ.
މެޗަށް ފަހު ވާހަކަ ދައްކަމުން ބާސާގެ ކޯޗު ލުއިސް އެންރިކޭ ބުނީ ޕެންލްޓީގައި މިހާރަށް ވުރެން ރަނގަޅަށް މަސަތްކަތް ކުރެން ޖެހޭ ކަމަށާއި ނަމަވެސް ޕެނަލްޓީ އާންމުކޮށް ޖަހާ މެސީ ސުއަރޭޒް އަދި ނޭމާ އަށް ފުރިހަމައަށް އިތުބާރު އެބަ އޮތް ކަމަށެވެ.