18 Feb 2016, 10:01
ޗެމްޕިއަންސް ލީގުގެ ގަދަ 16ގެ ފުރަތަމަ ލެގުގައި ރޭ އިޓަލީގެ ރޯމާގެ މައްޗަށް 0-2 ގެ ނަތީޖާއަކުން ކުރި ހޯދައިގެން ރެއާލް މެޑްރިޑުން ކުއާޓާއާ ގާތަށް ޖެހިލައިފި އެވެ.
ރޯމާގެ އަމިއްލަ ދަނޑުގައި ކުޅުނު އެ މެޗުގެ ފުރަތަމަ ހާފްގެ ކުރީ ކޮޅުގައި ރޯމާ އިން ރަނގަޅު ކުޅުމެއް ދެއްކި ނަމަވެސް ރެއާލް އިން ވަނީ މަޑުމަޑުން ގޭމުގެ ތެރެއަށް ވަދެ މެޗުގެ ކޮންޓްރޯލް ހޯދައިފަ އެވެ. ނަމަވެސް ފުރަތަމަ ހާފު ނިމިގެން ދިޔައީ ދެ ޓީމުން ކުރެ އެއްވެސް ޓީމަކަށް ގޯލެއް ޖަހާނެ ރަނގަޅު ފުރުސަތެއް ތަނަވަސް ނުކުރެވި އެވެ.
ރޯމާ އާއި ރެއާލް ކުޅުނު މެޗުގައި ރޮނާލްޑޯ ބޯޅަ ހިފައިގެންދަނީ --- ފޮޓޯ: އޭޕީ
އެ މެޗުގައި ރެއާލް އަށް ލީޑް ލިބިގެންދިޔައީ މެޗުގެ 57 ވަނަ މިނެޓްގައި ކްރިސްޓިއާނޯ ރޮނޯލްޑޯގެ ގޯލުންނެވެ. އެ މެޗުގައި މޮޅު ކުޅުންތެރިއާ ކަން ވެސް ހޯދި ރޮނާލްޑޯ ވަނީ މިފަހަރުގެ ޗެމްޕިއަންސް ލީގުގައިި 12 ގޯލު ކާމިޔާބުކޮށްފަ އެވެ.
ދެވަނަ ހާފް ނިމުމުގެ ކުރިން ރެއާލްގެ ލީޑް އިތުރަށް ފުޅާ ކޮށްދިނީ 86 ވަނަ މިނެޓްގައި ބަދަލު ކުޅުންތެރިއެއްގެ ގޮތުގައި ކުޅުނު ނިކުއިން ޖެސީ ރޮޑްރިގޭޒް އެވެ.
ރޯމާ އާއި ރެއާލް ކުޅުނު މެޗުގައި ރޯމާގެ އެލް ޝަރާާވޭ އަތުން ބޯޅަ ހޯދުމަށް ރެއާލްގެ ޖޭމްސް މަސަތްކަތް ކުރަނީ --- ފޮޓޯ: އޭޕީ
މެޗަށް ފަހު ވާހަކަ ދައްކަމުން ރެއާލްގެ ކޯޗު ޒައިނުއްދީން ޒިދާން ބުނީ ނަތީޖާޔާ އާއި ކުޅުންތެރިން ދެއްކި ކުޅުމާއި ދޭތެރޭގައި ވެސް ހިތްހަމަޖެހޭ ކަމަށާއި މެޗުން މޮޅުވީ ކުޅުންތެރިންގެ ބުރަ މަސަތްކަތުން ކަމަށެވެ.
"އަހަރެމެންނަށް އިނގޭ މިއީ އުނދަގޫ މެޗަކަށް ވާނެ ކަން. ފުރަތަމަ ހާފްގައި ރޯމާ އިން ވަރަށް ބޮޑަށް އަހަރެމެންނަށް ޕްރެޝަރު ކުރި. ނަމަވެސް ކުޅުންތެރިން ހުއްޓާނުލާ ކުރި ބުރަ މަސަތްކަތުން ނަތީޖާ ނެރެވުނީ،" ޒިދާން ބުންޏެވެ.