17 Feb 2016, 23:00
އިންޑިއާގެ ކަނޑުގެ ސިފައިން ބޭނުން ކުރާ، މަތިންދާބޯޓު އުފުލާ މަނަވަރު "އައިއެންއެސް ވިކްރަމާދިތުޔަ" އަށް 4500 މީހުން ޒިޔާރަތް ކޮށްފައިވާ ކަމަށް އިންޑިއަން ހައިކޮމިޝަނުން ބުނެފި އެވެ.
އިއްޔެއާއި މިއަދު އާންމުންނަށް ހުޅުވާލައިގެން އާންމުކޮށް މަނަވަރަށް ޒިޔާރަތް ކުރުމުގެ ފުރުސަތު ހުޅުވާލާފައިވާއިރު ހަމައެކަނި މިއަދުވެސް 2800 މީހުން މަނަވަރަށް ޒިޔާރަތްކޮށްފައިވާ ކަމަށް ހައިކޮމިޝަނުން ބުންޏެވެ. އަދި އެއީ ބޮޑު ކާމިޔާބީއެއްގެ ގޮތުގައި އިންޑިއަން ހައިކޮމިޝަނުން ވަނީ ސިފަކޮށްފަ އެވެ.
ދިގުމިނުގައި 285 މީޓަރު އަދި ފުޅާ މިނުގައި 60 މީޓަރު ހުންނަ އައިއެންއެސް ވިކްރަމާދިތުޔައަކީ، އިންޑިއާގެ އަސްކަރިއްޔާގެ މަތިންދާބޯޓު އުފުލާ މަނަވަރުތަކުގެ ތެރެއިން އެންމެ ފަހުން ހިދުމަތާ ގުޅުނު މަނަވަރެވެ.
ފެބްރުއަރީ 16، 2015: އިންޑިޔާގެ މަތިންދާ ބޯޓު އުފުލާ މަނަވަރު ވިކްރަމާދިތުޔަ-- ސަންފޮޓޯ: ޝަފްނާ ހުސެއިން
ވިކްރަމާދިތުޔަ ރާއްޖެއަށް ކުރި ދަތުރަކީ އެ މަނަވަރު އިންޑިއާގެ އަސްކަރީ ހިދުމަތާ ގުޅުނު ފަހުން ބޭރު ގައުމަކަށް ކުރާ ދެ ވަނަ ދަތުރެވެ. އެ މަނަވަރުގެ ފުރަތަމަ ދަތުރު ކޮށްފައި ވަނީ ސްރީލަންކާ އަށެވެ. މަނަވަރުގެ ސެކަންޑް ކޮމާންޑރު ޖަނަތު ދޭވްލީވިދާޅުވެފައިވަނީ، މި ދަތުރަކީ ދެ ގައުމުގެ ދެމެދުގައި އޮތް އަސްކަރީ ގުޅުން އިތުރަށް ބަދަހިކުރުމުގެ މަގްސަދުގައި ކުރި ދަތުރެއް ކަމަށެވެ.
ޖަނަތު ދޭވްލީ ވިދާޅުވީ މަނަވަރަކީ 23 ބުރީގެ އިމާރާތަކާ އެއްވަރުގެ އުސްމިނެއް ހުރި މަނަވަރެއް ކަމަށެވެ. ފެނުން މައްޗަށް 13 ބުރި ހުރި އިރު ފެނުގެ އަޑީގައި 10 ބުރި ހުންނާނެ ކަމަށް އޭނާ ވިދާޅުވި އެވެ.
އައިއެންއެސް ވިކްރަމާދިތުޔާ ރާއްޖެއަށް ކުރާ ދަތުރުގައި، އައިއެންއެސް މައިސޫރާ އައިއެންއެސް ދީޕަކް ވެސް ބައިވެރިވެއެވެ. އައިއެންއެސް ދީޕަކް އަކީ މާލެއަށް މިދިޔަ އަހަރު ދިމާވި ފެނުގެ ކާރިސާއާ ގުޅިގެން އެހީ ފޯރުކޮށްދިނުމަށް ރާއްޖެ އައި މަނަވަރެކެވެ.
އައިއެންއެސް ވިކްރަމާދިތުޔަ ރާއްޖެއިން ފުރުމަށް ހަމަޖެހިފައިވަނީ މާދަމާގެ ވަގުތެއްގަ އެވެ.