17 Feb 2016, 22:52
އަދުގެ ސަރުކާރުން ދިވެހި ރައްޔިތަކަށްވެސް ހަމަހަމަ ހައްގުތަކެއް ލިބިދެވޭނެ ކަމުގެ ޔަގީންކަން ރައީސް އަބްދުﷲ ޔާމީން ދެއްވައިފި އެވެ.
ހުޅުމާލޭ ކުޑަކުދިންގެ ހިޔާ ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، މުޖުތަމައު އިސްލާހުކުރަން ތިބޭ މީހުންގެ ފެންވަރަށް ބަލާ ކަމަށްވާނަ " ދިވެހިރާއްޖެ އަނެއްކާވެސް ދެވަނަ ވިސްނުމަކަށް ދާން ޖެހޭ" ކަމަށެވެ. އަދި އެއީ ދީނީ ތަގުރީރުދީގެން ރަނގަޅުވާނެ ކަން ކަން ނޫން ކަމަށް ވިދާޅުވި އެވެ.
ރައީސް ޔާމީން ވިދާޅުވީ، އެމަނިކުފާނުގެ ސަރުކާރުގައި ދިވެހި ރައްޔިތުންނަށް ޔަގީންކޮށްދޭން ބޭނުންވަނީ، ކޮންމެ މީހަކީވެސް އެއްވަރުގެ ހައްގެއް ލިބިދެވޭ މިހެއް ކަމެވެ.
ކުޑަކުދިން ބިނާ ކުރުމުގެ އެންމެ ބޮޑު ރޯލެއް އަދާކުރަން ޖެހޭ ބަޔަކީ މުޖުތަމައުގެ ގޮތުގައި ރައީސް ޔާމީން ވަނީ ސިފަކުރައްވާފަ އެވެ. އަދި މިއަދު ރާއްޖޭގައި މިއޮތް މުޖުތަމައުގައި މައުސޫމުކަން އެބައޮތްތޯ ހިތާ ސުވާލުކުރަން ޖެހޭ ކަމަށް ރައީސް ޔާމީން ވިދާޅުވި އެވެ.
މުޖުތަމައުއަކީ ސަރުކާރު ނޫން ކަމަށާއި ސަރުކާރަކީ މުޖުތަމައުގެ އެއް މުއައްސަސާ ކަމަށް ޔާމީން ވިދާޅުވި އެވެ. އަދި މުޖުތަމައު ރަމްޒުކޮށްދެނީ ހުރިހާ ފަރުދުން ކަމަށް ވިދާޅުވި އެވެ.
މުޖުތަމައު ރަނގަޅު ކުރާ ކަމަށްވަންޏާ މުޖުތަމައު ރަަނގަޅުވާނީ ހަމައެކަނި ތުއްތު ކުދިންނާ ހަމައަކުންވެސް ނޫން. ޝައްކެއްވެސް ނެތް ތުއްތުކުދިންނާ ހަމައިންވެސް މަސައްކަތް ކުރަން ޖެހޭ. ތުއްތު ކުދިންނަށް މިފިލާވަޅު ނަގައިދެނީ މުދައްރިސުންތޯ؟. މުދައްރިސުން ނަގައިދެނީ ފޮތުގައި އޮންނަ ފިލާވަޅު. ދެން އެކުދިން އުނގެނޭ އެއްޗެއް އުނގެނެނީ ވަށައިގެންވާ މުޖުތަމައުއިން،"ރައީސް ޔާމީން
ރައީސް ޔާމީން ވިދާޅުވީ ދުނިޔޭގެ ހުރިހާ ހިސާބެއްގައިވެސް އެންމެ އަޅާލުން ނުލިބޭ ބަޔަކީ އަންހެނުންނާއި ކުޑަކުދިން ކަމަށެވެ. އެމަނިކުފާނުގެ ސަރުކާރުގެ އަމާޒަކަށް ވާނީ ތުއްތުކުދިންނަށް ބޭނުންވާ ހުރިހާ ކަމެއްވެސް ކޮށްދިނުނަށް ކަމަށް ޔާމީން ވަނީ ވިދާޅުވެފަ އެވެ. ކުޑަކުދިންގެ ހައްގުތަށް ހިމާޔަތް ކުރުމަށް ދައުލަތުން މަސައްކަތްކުރާއިރުވެސް ރާއްޖޭގެ އެކި ހިސާބުތަކުގައި މަދުން ނަމަވެސް ތުއްތު ކުދިންނަށް ގޯނާލިބި، ބައެއް ކުދިން ދުނިޔެ ދޫކޮށް ގޮސްފައިވާކަން ރައީސް ޔާމީން ވަނީ ފާހަގަކުރައްވާފަ އެވެ.
" ދާދި ފަހުން މިދިޔަ ހަފްތާގެ ތެރޭގައިވެސް މިފަދަ ހިތްދަތި ވާހަކައެއް އަޅުގަނޑުމެން އަޑުއެހީމު. ދައުލަތުން ދަނީ އެމައްސަލަ ބަލަމުން އެމައްސަލަ ތަހުގީގު ކުރަމުން. އެހެންނަމަވެސް އެއީ ދުނިޔޭގެ ހަގީގަތް.،" ރައީސް ޔާމީން ވިދާޅުވިއެވެ.
ތުއްތު ކުދިން މަގުތަކަށް ނުކުންނަން ޖެހޭ ސަބަބެއްގެ ގޮތުގައި ރައީސް ޔާމީން ފާހަގަކުރައްވާފައި ވަނީ އާއިލާ ރޫޅުން ނުވަތަ އާއިލާގެ ތެރޭގެ ހަމަނުޖެހުން ހިނގުމެވެ. އޭގެ އިތުރުން ބަނޑުހައި ކަމާއި ފަގީރުކަން އެއީވެސް ކުޑަކުދިން މަގުތަކުގައި އުޅެން ޖެހޭ ސަބަބެއް ކަމަށް ރައީސް ވަނީ ވިދާޅުވެފަ އެވެ. މުޅި ދުނިޔޭގެ އެންމެ ބޮޑު މުސީބާތަކީވެސް ފަގީރުކަން ކަމަށާއި ފަގީރުކަން އާއިލާއަކާ ބައްދަލުކޮށްފިނަމަ ހިއްސުތައް ކަންކުރަންވީ ގޮތް ކިޔައި ނުދޭނެ ކަމަށް ޔާމީން ވިދާޅުވި އެވެ.
ދުނިޔޭގައި ހިނގާ ހުރިހާ ނުބައިކަމަކާއި އުފާވެރިކަމެއް ރާއްޖޭގައި އެބަހުރި ކަމަށާއި އެހެންނަމަވެސް މަގުތަކުގެ މަތީގައި އުޅޭ ކުޑަކުދިންނެއް ނުފެންނަ ކަމަށް ރައީސް ޔާމީން ވިދާޅުވި އެވެ. އަދި ވިދާޅުވީ އަބަދުވެސް ކުޑަކުދިން ރައްކާތެރިކަމާއެކު ބަލަހައްޓާނެ އިންތިޒާމުތަކެއް ހަމަޖައްސަމުން އަންނަ ކަމަށެވެ. ކުޑަކުދިންނަށް ބޯހިޔާވަހިކަމާއި ސިއްހަތާއި ހުރިހާ އަސާސީ ހައްގަކީ ގާނޫނުތައް ލާޒިމްކުރާ އެއްޗެއްކަމަށްވީ ނަމަވެސް އެކަން ކޮށްދޭން ޖެހެނީ ދައުލަތުގެ ފަރާތުން ކަމަށް ރައީސް ޔާމީން ވަނީ ވިދާޅުވެފަ އެވެ.
" ގާނޫނުތައް އައުމަކީ ޝައްކެއްވެސް ނެތް ގޮތުގައި ލާޒިމު ކަމެއް. އެހެންނަމަވެސް އެއާ އެކީ އަބަދުވެސް އަޅުގަނޑު ގަބޫލުކުރަނީ ގާނޫނުގައި އަޅާދޭ ފޮޅުވަތަކުން އެ ގައުގު ހިމާޔަތެއް ނުވެ އޭ. އެއީ އެކަން ވާގޮތެއް ނޫން.،" ރައީސް ޔާމީން ވިދާޅުވިއެވެ.
ހުޅުމާލޭގައި ގާއިމް ކުރި ކުޑަކުދިންގެ ހިޔާ، ރައީސް އަބްދުﷲ ޔާމީންގެ އަނބިކަނބަލުން މެޑަމް ފާތިމަތު އިބްރާހިމް މިރޭ ވަނީ ހުޅުއްވާދެއްވާފަ އެވެ. ހުޅުމާލޭގެ ލާލޭ ސްކޫލާ ޖެހިގެން އޮންނަ ހުސް ބިމުގައި އިމާރާތް ކޮށްފައިވާ ކުޑަކުދިންގެ ހިޔާއަކީ ޔޫއޭއީގެ މަހުމޫދު އަލް ހާޖާގެ އާއިލާގެ ހިލޭ އެހީގެ ދަށުން އަޅާފައިވާ ތަނެކެވެ. ބާރަ ކޮޓަރީގެ އިމާރާތުގައި ހުރިހާ ހިދުމަތެއްވެސް ދިނުމަށް ހަމެޖެހިފައި ވަނީ ދެ ޖިންސުގެ ކުދިންނަށް ވަކިންނެވެ. ހުޅުމާލޭގައި އިމާރާތްކުރި ކުޑަކުދިންގެ ހިޔާ އަކީ 129 ކުދިންގެ ޖާގައިގެ ތަނެކެވެ.