17 Feb 2016, 00:15
ބާސެލޯނާގެ ބްރެޒިލް ފޯވާޑް ނޭމާގެ މުދާތަކުގެ ތެރެއިން 50 މިލިއަން ޑޮލަރުގެ އަގުހުރި މުދާ ހިފެހެއްޓުމަށް ބްރެޒިލްގެ ކޯޓަކުން އަމުރު ކޮށްފިއެވެ.
ބްރެޒިލްގެ ސައޮޕޯލޯގެ ފެޑެރަލް ކޯޓުން މިއަދު ކުރި އަމުރުގައިވާ ގޮތުން 2011 އިން 2013 އާ ދެމެދު ނޭމާ އާއި އޭނާގެ ހިއްސާ އޮންނަ ކުންފުނިތަކުން ދައްކަންޖެހޭ ޓެކްސްގެ ގޮތުގައި ކަނޑައަޅާފައިވާ 16 މިލިއަން ޑޮލަރާއި ޖޫރިމަނާ ފައިސާ ދައްކަން ދެން އެ މުދާ ހިފެހެއްޓާނެއެވެ.
ނޭމާ އާއި އޭނާގެ އާއިލާގެ ތިން ކުންފުންޏަކަށް ނިސްބަތްވާ މުދާތަށް ހިފެހެއްޓިއިރު އޭގެ ތެރޭގައި ޔޮޓަކާއި ޖެޓެއް ހިމެނެއެވެ. ޖޫރިމަނާ ފައިސާ ނޭމާ ނުދައްކައިފިނަމަ ކޯޓުން ނޭމާގެ މުދާ ވިއްކުމަށްފަހު އެ ފައިސާ ހަމަކުރާނެ ކަމަށް ކޯޓުން ބުނެއެވެ.
އެ މައްސަލައާއި ގުޅޭ ގޮތުން ފެޑެރަލް ޓެކްސް އޭޖެންސީގެ އޮފިޝަލަކާ ހަވާލާދީ އެސޯސިއޭޓެޑް ޕްރެސް އިން ބުނީ އެ އަމުރާ ގުޅިގެން ނޭމާއަށް އެ މައްސަލަ އިސްތިއުނާފު ކުރުމުގެ ފުރުސަތު އޮންނާނެ ކަމަށާއި އަދި ނޭމާ ދައްކަން ޖެހޭ ފައިސާ ދައްކައި ނިންމުމުން އެމައްސަލަ ނިމުނީ ކަމަށެވެ.
އަދި ހުކުމާ އެއްގޮތަށް ފައިސާ ދައްކައި ހަލާސް ކޮށްފިނަމަ ޖަލު ހުކުމެއް ނައިސް ނޭމާއަށް ސަލާމަތްވެވޭނެ ކަަމަށް ވެސް އޮފިޝަލު ބުންޏެވެ.