15 Feb 2016, 17:41
ހުރިހާ ސިޔާސީ ޕާޓީތަކާ އެކު އަލުން މަޝްވަރާތައް ކުރިއަށްގެންދެވުމަށް ރައީސް ޔާމީން ނިންމެވި ނިންމުމާ ގުޅިގެން ރާއްޖޭގެ ފަސް ސިޔާސީ ޕާޓީއަކަށް މަޝްވަރާތަކުގައި ބައިވެރިވުމަށް ސަރުކާރުން ދައުވަތު އަރުވައިފި އެވެ.
މަޝްވަރާތަކުގައި ބައިވެރިވުމަށް ދައުވަތު އެރުވި ފަސް ޕާޓީ އަކީ ސަރުކާރު ހިނގާ ޕީޕީއެމާއި އިދިކޮޅު އެމްޑީޕީ އާއި ޖުމްހޫރީ ޕާޓީ އާއި ސަރުކާރު ކޯލިޝަންގައި ހިމެނޭ އެމްޑީއޭ އަދި އަދާލަތު ޕާޓީ އެވެ.
ރައީސް އޮފީހުން ވަނީ އެ ޕާޓީތަކުގެ ފަރާތުން މަޝްވަރާތަކުގައި ބައިވެރިވާނެ ފަރާތްތަކުގެ މައުލޫމާތާއި މަޝްވަރާ ކުރަން ބޭނުންވާ މައްސަލަތައް ހުށަހެޅުމަށް އެ ޕާޓީތަކަށް އަންގާފަ އެވެ.
ރައީސް އޮފީހުން ބުނެފައި ވަނީ ސަރުކާރުގެ ފަރާތުން މަޝްވަރާތަކުގައި ބައިވެރިވާނީ ފިޝަރީޒް މިނިސްޓަރު ޑރ.މުހައްމަދު ޝައިނީ އާއި ޑިފެންސް މިނިސްޓަރު އާދަމް ޝަރީފު އުމަރު އަދި ޔޫތު މިނިސްޓަރ އަހްމަދު ޒުހޫރު ކަމަށެވެ.
ސިޔާސީ ޕާޓީތަކާ އެކު އަލުން މަޝްވަރާ ކުރަން ސަރުކާރުން ނިންމާފައި ވާއިރު، އެ މަޝްވަރާތަކުގައި މެދުވެރިއެއްގެ ރޯލު އަދާކުރުމަށް ކޮމަންވެލްތުގެ އިތުރުން އީޔޫ އަށްވެސް ސަރުކާރުން ވަނީ ދައުވަތު ދީފަ އެވެ.
އެ މަޝްވަރާތައް ކާމިޔާބުކަމާއެކު ކުރިޔަށްގެންގޮސް، ރައްޔިތުންނަށް ފައިދާކުރަނިވިފަދަ ނަތީޖާތަކެއް ހާސިލުކުރެއްވޭނޭކަމަށް ރައީސުލްޖުމްހޫރިއްޔާ އުންމީދުކުރައްވާ ކަމަށް ރައީސް އޮފީހުން ބުންޏެވެ.