14 Feb 2016, 14:54
މި އަހަރުގެ ޖަނަވަރީ މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް 1.7 ބިލިއަން ރުފިޔާ ބަލައިގެންފައި ވާކަމަށް އެ އޮތޯރިޓީން ބުނެފި އެވެ.
މީރާގެ ތަފާސް ހިސާބުތައް ދައްކާގޮތުން ޖަނަވަރީ މަހު މީރާ އަށް 1.7 ބިލިއަން ރުފިޔާ ބަލައިގަނެފައިވާ އިރު، މިދިޔަ އަހަރުގެ ޖަނަވަރީ މަހު ބަލައިގަނެފައި ވަނީ 1.5 ބިލިއަން ރުފިޔާ އެވެ.
މީރާ އަށް ބަލައިގެން ފައިސާގެ އަދަދު ލަފާ ކުރި އަދަދަށް ވުރެ 1.1 ޕަސެންޓް ދަށް ނަމަވެސް އެއީ މިދިޔަ އަހަރުގެ ޖަނަވަރީ މަހާ އަޅާބަލާ އިރު 11 ޕަސެންޓު އިތުރު އަދަދެކެވެ.
މިދިޔަ މަހުގެ ތެރޭގައި މީރާ އަށް އާމްދަނީގެ ގޮތުގައި 867 މިލިއަން ރުފިޔާ ލިބުނު އިރު، ޑޮލަރުގެ ގޮތުގައި 55.1 މިލިއަން ވަނީ ބަލައިގެންފަ އެވެ.
ބީޕީޓީގެ ގޮތުގައި މިދިޔަ މަހު މީރާއަށް 822 މިލިއަން ރުފިޔާ ލިބުނު އިރު، ޖީއެސްޓީގެ ގޮތުގައި ލިބިފައި ވަނީ 619.9 މިލިއަން ރުފިޔާ އެވެ.
މީރާ އިން ބުނިގޮތުގައި މީރާއަށް ބަލައިގެން އާމްދަނީ މިދިޔަ މަހު އިތުރުވެފައި ވަނީ ޖީއެސްޓީގެ ގޮތުގައި ލިބުނު ފައިސާ އިތުރުވުމުގެ އިތުރުން ގްރީން ޓެކްސް ނަގަން ފެށުމެވެ. ގްރީން ޓެކްސް ނަގަން ފެށީ މިދިޔަ ނޮވެމްބަރު މަހު އެވެ.
ގްރީން ޓެކްސްގެ ގޮތުގައި މީރާއަށް ޖަނަވަރީ މަހު 44 މިލިއަން ރުފިޔާ ލިބިފައިވެ އެވެ.