14 Feb 2016, 12:58
އުމްރާ ދަތުރަކާ އެކު، އަރަބި ގައުމުތަކުގައި ހުންނަ އިސްލާމީ އާސާރީ ތަންތަނާއި ބިނާތައް ބަލާލަން ދިއުމުގެ އިތުރަށް ތިން ހަރަމަށް ކުރާ ދަތުރެއްގެ ފުރުސަތު މޯލްޑިވްސް ހައްޖު ކޯޕަރޭޝަނުން ހުޅުވާލައިފި އެވެ.
ހައްޖު ކޯޕަރޭޝަންގެ އޮފިޝަލަކު މިއަދު "ސަން" އަށް ވިދާޅުވީ 20 ދުވަހުގެ އެ ދަތުރަކީ އުމްރާގެ އިތުރުން އިސްލާމީ އަދި އާސާރީ ބައެއް ތަންތަނަށް ޒިޔާރަތްކުރުމުގެ ފުރުސަތު ލިބިގެންދާނެ ދަތުރެއް ކަމަށެވެ.
އެގޮތުން ދަތުރުގެ ޓުއާ ހަމަޖައްސާފައިވާ ގޮތަށް ބަލާ އިރު، ފުރަތަމަ ދާނީ ޖޯޑަން އަށެވެ. އެތަނުގައި ދެ ދުވަސް މަޑުކުރުމަށް ފަހު ފަލަސްތީނުގައި ތިން ދުވަސް މަޑުކުރާނެ ކަމަށް އެ ކޯޕަރޭޝަނުން ބުންޏެވެ. އަދި މަސްޖިދުލް އަގްސާގައި ހުކުރު ނަމާދު ކުރުމުގެ އިތުރަށް، މިސްރުގައި ހަ ދުވަސް، މައްކާގައި ހަތް ދުވަސް އަދި މަދީނާގައި ދެ ދުވަސް މަޑުކުރާނެ ކަމަށެވެ.
ހައްޖު ކޯޕަރޭޝަންގެ އޮފިޝަލް ވިދާޅުވީ ދަތުރު ރާވަނީ އެ ދަތުރުގެ ތިން ހުކުރު ނަމާދު ތިން ޙަރަމްގައި ކުރެވޭނެ ގޮތަކަށް ކަމަށެވެ. އެގޮތުން މަސްޖިދުލް ޙަރަމް، މަސްޖިދުލް ނަބަވީ އަދި މަސްޖިދުލް އަޤްސާގައި ހުކުރު ކުރެވޭނެ ގޮތަކަށް ދަތުރު ރާވާކަމަށް އޮފިޝަލް ވިދާޅުވި އެވެ.
ދަތުރުގެ އަގަކީ 45965 ރުފިޔާ އެވެ. އެ އަދަދަށް ހައްޖު ކޯޕަރޭޝަނަށް ފައިސާ ދެއްކުމުން ދަތުރުގެ ދެކޮޅު ޓިކެޓާއި، ހުރުމާއި ކެއުމުގެ އިތުރުން ފަތުރު ހަމަޖެހޭނެ ކަމަށް އެ ކޯޕަރޭޝަނުން ބުންޏެވެ.
ދަތުރަށް ރަޖިސްޓަރީ ކުރުމާއި ފައިސާ ބަލައިގަތުމުގެ އެންމެ ފަހު ތާރީހަކީ 15 މާޗް 2016 އެވެ.