11 Feb 2016, 16:58
ލ. ފޮނަދޫގައި މިސްކިތެއް ބިނާ ކުރުމުގެ މަސައްކަތް ނުވަ މިލިއަން ރުފިޔާ އަށް އަމީން ކޮންސްޓްރަކްޝަނާ މިއަދު ހަވާލުކޮށްފިއެވެ.
މިއަދު އިސްލާމީ މަރުކަޒުގައި ބޭއްވި ޚާއްސަ ރަސްމިއްޔާތެއްގައި، އެ އެއްބަސްވުމުގައި ސަރުކާރުގެ ފަރާތުން ސޮއި ކުރެއްވީ އިސްލާމިކު މިނިސްޓަރު ޑރ. އަހުމަދު ޒިޔާދު ބާގިރެވެ. އަދި އަމީން ކޮންސްޓްރަކްޝަންގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގު ޑިރެކްޓަރު އަބްދުﷲ މުހައްމަދު އެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އިސްލާމިކު މިނިސްޓަރު ވިދާޅުވީ، މިއަދަކީ ސަރުކާރުގެ ތަރައްގީގެ މާ ތަކުގެ ތެރެއިން އާ މަލެއް ފޮޅިގެންދާ ދުވަހެއް ކަަމަށެވެ.
"ރައީސުލް ޖުމްހޫރިއްޔާ އަބްދުﷲ ޔާމީން އަބްދުލްގެ ގައްޔޫމް، އެމަނިކުފާނުގެ ހިކުމަތްތެރިކަމާ ވިސްނުން ފުޅުގެ ދަށުން ދިވެހިރާއްޖޭގެ އެކިއެކި ސަރަހައްދުތަކުގައި އުމްރާނީ ތަރައްގީ ކުރުމަށްޓަކައި އެމަނިކުފާނުގެ ކުރައްވަމުން ގެންދަވާ ނަތީޖާ ފެނިގެންދާ ދުވަހެއް މިއަދަކީ، މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މިއަދު ސޮއި ކުރި އެއްބަސްވުމަކީ ފޮނަދޫ އަށް ބަދަލު ކުރި ގާދޫ ރައްޔިތުންނަށް ނަމާދު ކުރެވޭނެ އިންތިޒާމެއް ހަމަޖެއްސުމަށް ރައީސްގެ އިސްނެންގެވުމުގެ މަތިން ސޮއިކުރި އެއްބަސްވުމެއް ކަމަށެވެ.
"އަޅުގަނޑުގެ އުއްމީދަކީ އިރާދަކުރެއްވިއްޔާ މި މިސްކިތުގައި އަންނަ ރޯދަ މަހު ފޮނަދޫ ރައްޔިތުންނަށް ނަމާދު ކުރަން ފެށޭނެ ކަމުގެ އުއްމީދު އަޅުގަނޑުމެންނަށް އެބަ އޮތް. 500 މީހުންގެ ޖާގައިގެ މިސްކިތެއް މިއީ،" މިނިސްޓަރު ވިދާޅުވިއެވެ.
އެ ރަސްމިއްޔާތުގައި ވާހަކަ ދައްކަވަމުން ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވީ، މިއަދު ސޮއި ކުރި އެއްބަސްވުމަކީ ފޮނަދޫ އަށް ބަދަލު ކުރި ގާދޫ ރައްޔިތުންނަށް ކައިރި ހިސާބަކުން ނަމާދު ކުރުމުގެ ފުރުސަތު ހޯދައި ދިނުމަށް ސޮއިކުރި އެއްބަސް ވުމެއް ކަމަށެވެ.
އޭނާ ވިދާޅުވީ، އިސްލާމް ދީނުގެ ކަންތައްތައް އެންމެ ރަނގަޅު ގޮތުގައި ކުރިއަށް ގެންދިއުމަށް މިއަދުގެ ސަރުކާރު ވަރަށް ބޮޑު އަހައްމިއްޔަތު ކަމެއް ދޭ ކަމަށެވެ.
ފޮނަދޫގައި ބިނާ ކުރާ މިސްކިތުގެ އަމަލީ މަސައްކަތް މާދަމާ ފެށުމަށް ހަމަޖެހިފައިވާއިރު، އެއީ މިސްކިތު ފަންޑުން ޚަރަދުކޮށްގެން ބިނާ ކުރުމަށް ހަމަޖެހިފައިވާ މިސްކިތެކެވެ.