07 Feb 2016, 12:01
އދ. ދަނގެތި އަދި ރ. މީދޫ ފެނުގެ ނިޒާމު ގާއިމު ކުރުމުގެ އެއްބަސްވުމުގައި އެންވަޔަރަންމެންޓް މިނިސްޓްރީ އާއި ދެ ކުންފުންޏަކާ އެކު މިއަދު ސޮއިކޮށްފި އެވެ.
މިނިސްޓްރީ ގައި އޮތް ރަސްމިއްޔާތެއްގައި އެއްބަސްވުންތަކުގައި މިނިސްޓްރީގެ ފަރާތުން ސޮއި ކުރެއްވީ އެންވަޔަރަންމެންޓް މިނިސްޓަރު ތޯރިގް އިބްރާހިމް އެވެ.
ދަނގެތި ފެނުގެ ނިޒާމު ގާއިމު ކުރުމަށް ހަވާލުކޮށްފައި ވަނީ އިންޑިއާގެ ކުންފުންޏެއް ކަމަށްވާ ލަކީ އެކްސްޕޯޓް އާއެވެ. މިއަދުން ފެށިގެން 270 ދުވަހުގެ ތެރޭގައި ނިންމުމަށް އެއްބަސްވެވުނު އެ މަސައްކަތުގެ އަގަކީ 26،431،295.86 ރުފިޔާ އެވެ.
އދ. ދަނގެތި އަދި ރ. މީދޫ ފެނުގެ ނިޒާމު ގާއިމުކުރުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތު -- ސަން ފޮޓޯ: ޔޫސުފް ސޮފްވާން
އެ ކުންފުނީގެ ފަރާތުން އެއްބަސްވުމުވައި ސޮއި ކުރެއްވީ، ޑިރެކްޓަރ ވިނޭ ސިން އެވެ.
އެއްބަސްވުމުގައި ސޮއި ކުރާ ތާރީހުން ފެށިގެން 330 ދުވަހުގެ ތެރޭގައި މަސައްކަތް ނިންމާގޮތަށް މީދޫ ފެނުގެ ނިޒާމު ގާއިމު ކުރުމަށް ހަވާލު ކުރީ އެމްޑަބްލިއުއެސްސީ އާ އެވެ. އެއީ އެރަށުގެ ނަރުދަމާގެ މަސައްކަތްވެސް ކުރަމުން އަންނަ ކުންފުންޏެވެ.
ެއެ އެއްބަސްވުމުގެ އަގަކީ 30،836226.25 ރުފިޔާ އެވެ. އެމްޑަބްލިއުއެސްސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރު ފަޒުލް ރަޝީދު އެވެ.
މިއަދު ވެވުނު ދެ އެއްބަސްވުމުގެ ދަށުން ފެނުގެ ނިޒާމް ގާއިމު ކުރުމަށް ބޭނުންވާ ސާރވޭ އަދި ޑިޒައިންގެ މަސައްކަތް ކުރެވި މުޅި ރަށުގައި ފެނުގެ ނިޒާމު ގާއިމު ކުރެވިގެންދާނެ ކަމަށް މިނިސްޓްރީން ބުނެ އެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ތޯރިގް ވިދާޅުވީ މި އަހަރު ތެރޭގައި މީދޫ އަދި ދަނގެތީގެ ފެނުގެ ނިޒާމު ގާއިމު ކުރެވިގެންދާނެ ކަމަށާއ،ި މިނިސްޓްރީ އާ ގުޅިފައިވާ ސަރުކާރުގެ ވައުދުތައް ފުއްދުމުގައި ހަލުވި މަސައްކަތްތަކެއް ކުރައްވަމުން އަންނަ ކަމަށެވެ.
އެއްބަސްވުމާ ގުޅިގެން އެމްޑަބްލިއުއެސްސީގެ އެމްޑީ ފަޒުލް ވިދާޅުވީ، އެ ކުންފުނިން އަވަސް އަރުވާލައިގެން އެއްވެސް މަސައްކަތެއް ނުކުރާނެ ކަމަށާއި، ކުރާ މަސައްކަތުގެ ކޮލިޓީ ހިފަހައްޓާނެ ކަމަށެވެ.