05 Feb 2016, 20:51
މިސަރުކާރުން ކޮރަޕްޝަން އަށް ދޭނީ "ޒީރޯ ޓޮލެރެންސް" ކަމަށް ރައީސުލްޖުމްހޫރިއްޔާގެ ތަރުޖަމާން އިބްރާހިމް މުއާޒު އަލީ ވިދާޅުވެއްޖެ އެވެ.
ހިޔާނާތުގެ ބޮޑެތި މައްސަލަތަކެއް ފާހަގަކޮށް ނެރެފައިވާ އެމްއެމްޕީއާރުސީގެ އޮޑިޓާއި ގުޅޭ ގޮތުން ސަން އިން ކުރި ސުވާލަކަށް ޖަވާބް ދެއްވަމުން މުއާޒު ވިދާޅުވީ ކިތަންމެ ނުފޫޒު ގަދަ ފަރާތްތަކަށް ކޮރަޕްޝަންގެ ތުހުމަތު ކުރެވުނު ނަމަވެސް މިސަރުކާރުން ކޮރަޕްޝަނަށް ދޭނީ ޒީރޯ ޓޮލެރެންސް ކަމަށެވެ.
"އެއްވެސް ފަރާތަކުން އެއީ ސިޔާސީ ޕާޓީއެއްގެ ނުފޫޒު ގަދަ ލީޑަރެއް ނަމަވެސް އަދި ސަރުކާރުގެ ކިތަންމެ މަތީގައި ހުންނެވި ބޭފުޅެއް ކަމުގައިވީ ނަމަވެސް ކޮރަޕްޝަންއަށް ދޭނީ ޒީރޯ ޓޮލެރެންސްއޭ،" މުއާޒު ވިދާޅުވި އެވެ.
ގެއްލުނު ފައިސާ އަނބުރާ ހޯދޭނެ ގޮތްތަކެއް ބެލުމަށް ރައީސުލްޖުމްހޫރިއްޔާ ވަނީ ވަޒީރުންގެ މަޖިލީހުގައި މަޝްވަރާ ކުރައްވާފައި ކަމަށާއި އޮޑިޓް ރިޕޯޓަށް ފަހު ވަޒީރުންގެ މަޖިލީހުގައި މަޝްވަރާކުރެއްވުމަށް ފަހު އެމަޖިލީހުގެ ލަފާގެ މަތިން ގޮތްތަކެއް ނިންމަވާނެ ކަމަށް ވެސް މުއާޒު ވިދާޅުވި އެވެ.
ކޮރަޕްޝަންގެ މައްސަލަތައް ބެލުމަށް ނުފޮރުޅާ އެންމެ ގަލެއްވެސް ނޯންނާނެ ކަމަށާއި ދިވެހި ރައްޔިތުންގެ ފައިސާއަށް ހިޔާނާތްވެފައިވާ ފަރާތްތަކުން އިންސާފްގެ މައްޗަށް ގެނައުމަށް ވަރުބަލިކަމެއް ނެތި މިސަރުކާރުން މަސައްކަތް ކުރާނެ ކަމަށް މުއާޒު ވިދާޅުވި އެވެ.
ރައީސުލްޖުމްހޫރިއްޔާގެ އެންގެވުމުގެ މަތިން އޮޑިޓާ ޖެނެރަލް އޮފީހުން ތައްޔާރުކޮށްފައިވާ އޮޑިޓް ރިޕޯޓުގައި މިހާތަނަށް ރާއްޖޭގައި ހިނގާފައިވާކަން ހާމަވެފައިނުވާވަރުގެ ކޮރަޕްޝަންގެ މައްސަލަތައް ހިނގާފައިވާކަން ވަނީ ފާހަގަކޮށްފަ އެވެ.