04 Feb 2016, 09:08
މީހެއްގެ މައްޗަށް ކުށެއްގެ ތުހުމަތު ކުރެވޭ އިރަށް އިދިކޮޅު އެމްޑީޕީން އެމީހަކާ އެކު ކޯލިޝަން ހަދާ ކަމަށް ރައްޔިތުންގެ މަޖިލީހޫގެ ފުވައްމުލަކު މެދު ދާއިރާގެ މެމްބަރު އަދި ޕީޕީއެމްގެ ޕާލަމެންޓްރީ ގްރޫޕުގެ މެމްބަރު ޢަލީ ޝާހު ތުހުމަތު ކުރައްވައިފި އެވެ.
ސަންޓީވީގެ 'ސިޔާސީ އޮއިވަރު' ޕްރޮގްރާމްގައި އެމްޑީއޭގެ ނައިބު ލީޑަރު އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު ޢަލީ މައުރޫފާ ދެ ބޭފުޅުން ވާހަކަފުޅު ދައްކަވަމުން ޝާހު ވިދާޅުވީ، ކުށުގެ ތުހުމަތު ކުރެވޭ މީހުންނަށް އެމްޑީޕީގެ މަގާމުތައް ވެސް ލިބޭ ކަމަށެވެ.
"...އަޅުގަނޑުމެންނަށް މިފެންނަނީ އެމްޑީޕީން ވެސް ހަމަ މިއަދު ކޮންމެވެސް މީހަކަށް ތުހުމަތުކޮށް، ކުށެއްގެ ތުހުމަތުކުރެވޭ އިރަށް އެބޭފުޅުންނާ އެއްކޮށް އެބަ ކޯލިޝަން ހެދޭ. އެބޭފުޅުންގެ ޕާޓީން އެބަ މަގާމުތައް ލިބޭ،" އެމްޑީޕީއަށް ފާޑުވިދާޅުވެ ވާހަކަފުޅު ދައްކަވަމުން ޝާހު ވިދާޅުވި އެވެ.
ރޭގެ ޕްރޮގްރާމްގައި ވާހަކަފުޅުދައްކަވަމުން މައުރޫފު ވިދާޅުވީ، ރައީސުލްޖުމްހޫރިއްޔާ ޢަބުދުﷲ ޔާމީނުގެ ސަރުކާރުގައި އެއްވެސް ބޭފުޅަކު ކޮރަޕްޝަންގެ އަމަލެއް ހިންގައިފި ނަމަ ސަރުކާރުން އެމައްސަލަ ބަލާނެ ކަމަށެވެ.
"...މިސަރުކާރުގައި ވެސް މީހަކު ފަސާދައިގެ އަމަލެއް ހިންގަފާނެ. ނޫނީ ޚިޔާނާތްތެރިވެދާނެ. ނޫނީ ކޮރަޕްޝަންގެ އަމަލެއް ހިންގަފާނެ. ވަޒީރެއް ވެސް ހިންގަފާނެ. ނައިބު ރައީސެއް ވެސް ހިންގަފާނެ. ބޯޑެއްގެ އެމްޑީ ވެސް ހިންގަފާނެ. ޗެއާމަނަކު ވެސް ހިންގަފާނެ. އެހެންވީމާ އެ ހިންގާ މީހަކާ ދޭތެރޭގައި މި ދައުލަތުން، ނޫނީ މިސަރުކާރުން އަދަބު ދޭނެ އިނގޭތޯ،" މައުރޫފު ވިދާޅުވި އެވެ.