01 Feb 2016, 14:22
އެފްއޭއެމްގެ އެކްޓްރާ އޯޑިނަރީ ކޮންގުރެސް މާޗް މަހުގެ ދެ ވަނަ ދުވަހު ބޭއްވުމަށް އިއުލާން ކޮށްފިއެވެ.
އެފްއޭއެމްގެ ޖެނަރަލް ސެކެޓްރީ ބައްސާމް ޢަދީލް ޖަލީލް ވިދާޅުވީ އެ ކޮންގްރެސްއަށްފަހު އިންތީޚާބު ބާއްވަން އިއުލާން ކުރާނެ ކަމަށެވެ.
އޭނާ ބުނީ ކޮންގްރެސްގައި އެފްއޭއެމްގެ އާ އަސާސީ ގަވާއިދު އިސްލާހު ކުރުމަށް ދެ ވަނަ ޑިވިޝަން އާއި ތިން ވަނަ ޑިވިޝަންގެ ކްލަބުތަކުން ވޯޓު ދޭނެ ބަޔަކު ކަނޑައެޅުމަށްޓަކައި ވަރަށް އަވަހަށް ޕްރައިމަރީއެއް ބާއްވާނެ ކަމަށެވެ. ފުރަތަމަ ޑިވިޝަންގެ ހުރިހާ ކްލަބަކުން ވެސް ކޮންގްރެސްގައި ވޯޓު ދެވޭނެ އެވެ. ދެ ވަނަ ޑިވިޝަނާއި ތިން ވަނަ ޑިވިޝަނުން ކޮންގްރެސްގައި ވޯޓު ދެވޭނީ ހަތް ޓީމެވެ. އެއީ ދެ ވަނަ ޑިވިޝަންގެ ފަސް ކްލަބާއި ތިން ވަނަ ޑިވިޝަންގެ ދެ ކްލަބަށެވެ.
ބައްސާމް ވިދާޅުވީ ކޮންގްރެސްއާ ދެމެދު އޮތް 30 ދުވަހުގެ މުއްދަތު ތެރޭގައި އެ ޕްރައިމެރި ބޭއްވުމަށް އިއުލާން ކުރާނެ ކަމަށެވެ.
އެފްއޭއެމުން ވަނީ އަލަށް އެކުލަވާލި އަސާސީ ގަވައިދު ފާސް ކުރުމަށް މިދިޔަ އަހަރު ސެޕްޓެމްބަރު މަހު ފަހެއްގައި ވެސް ކޮންގްރެސްއެއް ބާއްވާފަ އެވެ.
ނަމަވެސް އެ އަސާސީ ގަވާއިދުގައި ޖަމްއިއްޔާތަކާ ބެހޭ ގަވައިދުގައި ހިމެނޭ ތިން މާއްދާއެއް ހިމެނުމަށް ހޯމް މިނިސްޓރީން ވަނީ އެފްއޭއެމްއަށް އަންގާފައެވެ.
ބައްސާމް ވިދާޅުވީ އަންނަ މަހު ދެ ވަނަ ދުވަހު ބާއްވާ ކޮންގްރެސްގައި ފާސް ކުރާނީ ހޯމް މިނިސްޓރީއިން ލާފާ ދީފައިވާ މާއްދާތަކަށް ކަމަށެވެ.