01 Feb 2016, 09:58
ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތް ކުރާ ކައުންސިލްގެ އިންތިހާބު އަންނަ ބުދަ ދުވަހު ބާއްވާ ގޮތަށް ނިންމާފައިވާ ކަމަށް މިނިސްޓްރީ އޮފް ލޯ އެންޑް ޖެންޑާ އިން ބުނެފި އެވެ.
ޑިސްއެބިލިޓީ ކައުންސިލަށް މެމްބަރުން އިންތިހާބު ކުރުމަށް ހަމަޖެހިފައި ވަނީ ދެ ދާއިރާއަކުންނެވެ.
ޖެންޑާ މިނިސްޓްރީން ކުރި އިއުލާނެއްގައި ވަނީ މި މަހުގެ ތިން ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގައި ހޮވުމަށް ހަމަޖެހިފައި ވަނީ ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ޖަމްއިއްޔާ ނުވަތަ އެފަދަ މީހުންނަށް ޚިދުމަތްދޭ ޖަމްއިއްޔާތަކުން އިންތިޚާބުކުރާ މެންބަރަކާއި ކުޅެދުންތެރިކަން ހުންނަ މީހުންގެ ތެރެއިން އެމީހުން އިންތިޚާބުކުރާ މެންބަރެއް ކަމަށެވެ.
އެގޮތުން ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ޖަމްއިއްޔާ ނުވަތަ އެފަދަ މީހުންނަށް ޚިދުމަތްދޭ ޖަމްއިއްޔާތަކުން އިންތިހާބުގައި ކުރިމަތިލާފައި ވަނީ މޯލްޑިވްސް އެސޯސިއޭޝަން އޮފް ފިޒިކަލް ޑިސޭބަލްސް އަދި މޯލްޑިވްސް އޯޓިޒަމް އެސޯސިއޭޝަން އިން ނެވެ.
ކުޅެދުންތެރިކަން ހުންނަ މީހުންގެ ތެރެއިން މެމްބަރަކު ހޮވުމަށް ކުރިމަތިލާފައި ވަނީ މ.ކުރެލި، އަހްމަދު ފާއިޒް (ކެނޑިޑޭޓް ނަންބަރު 1) އާއި ގއ.ވިލިނގިލި ފީރޯޒްގެ، އަހްމަދު ނަޖީބް (ކެނޑިޑޭޓް ނަންބަރު 2) އަދި ވ.ނޯޗާންސް މުހައްމަދު މާޒިން (ކެނޑިޑޭޓް ނަންބަރު 3) އެވެ.
ބުދަ ދުވަހު އޮންނަ އިންތިހާބު ކުރިއަށް ދާނީ ހެނދުނު 9:00 ން މެންދުރު 14:00 އަށެވެ. އިންތިހާބުގައި މާލޭގައި ވޯޓުލާން ރަޖިސްޓްރީ ކުރި ފަރާތްތަކުން ވޯޓުލުމަށް ހަމަޖެހިފައި ވަނީ ޖެންޑާ މިނިސްޓްރީ ހިންގަމުން އަންނަ ގ.ބިއްލޫރިޖެހިގޭ ގައިބެހެއްޓިފައިވާ ވޯޓު ފޮށްޓަށެވެ.
ހުޅުމާލޭގައި ވޯޓުލުމަށް ރަޖިސްޓްރީ ކުރި ފަރާތްތަކުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގައި ބެހެއްޓިފައިވާ ފޮށްޓަށް ވޯޓުލުމަށް ހަމަޖެހިފައިވާ އިރު، ވިލިމާލޭގައި ވޯޓުފޮށި ބެހެއްޓިފައި ވަނީ އެރަށު ޒުވާނުންގެ މަރުކަޒުގަ އެވެ.
އަތޮޅުތެރޭގައި ވޯޓުލުމަށް ހަމަޖެހިފައި ވަނީ ކޮންމެ ރަށެއްގެ ރަށު ކައުންސިލްގެ އިދާރާގައި ބެހެއްޓިފައިވާ ފޮށްޓަށެވެ.
ޑިސްއެބިލިޓީ ކައުންސިލްގެ މެމްބަރުންނަށް ދެނީ 5000 ރުފިޔާގެ އެލަވެންސެކެވެ.
އެ ކައުންސިލަކީ ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނުގެ ދަށުން އުފައްކާ ކައުންސިލެކެވެ.