31 Jan 2016, 22:36
މާޒިޔާ ސްޕޯޓްސް އެންޑް ރެކްރިއޭޝަންގެ ޓްރަޔަލްއިން ފާހަގަ ކުރެވުނު ހަތަރު ކުޅުންތެރިޔަކު އެޓީމުގެ ކޮންޓްރެކްޓްގައި ސޮއިކޮށްފިއެވެ.
މިމަހު 20 ވަނަ ދުވަހު ފެށި މިޓްރެޔަލްއިން ފާހަގަ ކުރެވުނު ހަތަރު ކުޅުންތެރިން ލައްވައި އެޓީމުން ސޮއިކޮށްފައިވަނީ ތިން އަހަރު ދުވަހުގެ އެއްބަސްވުމެއްގައެވެ.
މާޒިޔާގެ ޖެނެރަލް ސެކްރެޓަރީ ޢަބްދުލް ވައްހާބް ވިދާޅުވީ، އެ ހަތަރު ކުޅުންތެރިންނާ މެދު މާޒިޔާގެ ކޯޗިން ސްޓާފުން ވަރަށް ބޮޑަށް ހިތްހަމަޖެހުން ފާޅުކޮށްފައިވާ ކަމަށެވެ.
އަދި އެކުޅުންތެރިންނަކީ ރާއްޖޭގެ ފުރަތަމަ ޑިވިޝަންގައި ވާދަ ކުރުމަށް އައުޓް ސްޓޭޑިން ކުޅުންތެރިންތަކެއް ކަމަށް ކޯޗިން ސްޓާފުން ފާހަގަކޮށްފައިވާ ކަމަށެވެ.
"މިކުޅުންތެރިން ވަރަށް އައުޓްސްޓޭޑިންގް. ރާއްޖޭގެ އެންމެ މަތީ ފަންތީގައި ވާދަކުރުމުގެ ގާބިލުކަން މިކުޅުންތެރިންގެ ކިބައިގައި އެބަހުރި،" ވައްހާބު ވިދާޅުވިއެވެ.
އޭނާ ވިދާޅުވީ، މިކުޅުންތެރިންގެ އުމުރަކީ 17 އަހަރާއި 20 އަހަރާ ދެމެދުގެ ކަމަށާއި ޓީމާއެކު ކުޅެ ގިނަ ތަޖުރިބާ ތަކެއް ލިބުމުން މި ކުޅުންތެރިންގެ އަސްލު ފެންވަރު ފެނިގެންދާނެ ކަމަށެވެ.
މާޒިޔާއިން ކުރިން ބުނެފައިވަނީ ޓްރަޔަލްއިން ފާހަގަ ކުރެވޭ ކުޅުންތެރިންނަށް މާޒިޔާގެ 23 އަހަރުން ދަށުގެ ޓީމުންނާއި 19 އަހަރުން ދަށުގެ ޓީމުން ވެސް ފުރުސަތު ދޭނެ ކަމަށެވެ.