29 Jan 2016, 22:45
ގއ. ވިލިނގިލި ކައުންސިލް މެމްބަރެއްގެ ގަޔަށް ތޫނު އެއްޗަކުން ހަމަލާ ދީ ޒަހަމްކޮށްލައިފި އެވެ.
ވިލިނގިލި ކައުންސިލްގެ ރައީސް ނިޔާޒު ނިޒާރު "ސަން" އަށް މިރޭ ވިދާޅުވީ މިރޭ 9:30 އެހާކަށްހާއިރު އެރަށު ކައުންސިލް މެމްބަރު ފަތުހީ މޫސާއަށް ތޫނު އެއްޗަކުން ހަމަލާދީ ޒަހަމް ކޮށްލައިފައިވާ ކަމަށެވެ.
"މިހާރު ޒަހަމްވިތަން ވަނީ ފަހާފައި. އެކަމަކު އަދިވެސް އޮތީ ހޮސްޕިޓަލުގައި،" އޭނާ ވިދާޅުވި އެވެ.
ފުލުހުންގެ މީޑިއާ އޮފިޝަލަކު "ސަން" އަށް މިރޭ ވިދާޅުވީ މިރޭ 9:15 އެހާކަށްހާއިރު ގއ. ވިލިނގިލީގައި ތޫނު އެއްޗަކުން މީހަކަށް ހަމަލާދީފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ. ނަމަވެސް އެކަމުގެ ތަފްސީލެއް އޭނާ ހާމައެއް ނުކުރައްވަ އެވެ.