24 Jan 2016, 15:44
މަނީލޯންޑަރިންގެ ދައުވާ އުފުލާފައިވާ މ. ޝުރާމަންޒިލް، ހާމިދު އިސްމާއިލްގެ ޝަރީއަތް ނިމެންދެން ގޭ ބަންދަށް ބަދަލު ކުރަން ކްރިމިނަލް ކޯޓުން ކުރި އަމުރު ޕީޖީއިން ހައިކޯޓުގައި އިސްތިއުނާފުކޮށްފި އެވެ.
ޝަރީއަތްނިމެންދެން ހާމިދު ގޭބަންދަށް ބަދަލުކުރީ މިމަހުގެ 17 ވަނަ ދުވަހު އެވެ. އެމައްސަލަ ޕީޖީގެ ފަރާތުން މިމަހުގެ 18 ވަނަ ދުވަހު އިސްތިއުނާފު ކުރިކަން ޕީޖީ އޮފީހުން ވަނީ 'ސަން' އަށް ކަށަވަރުކޮށްދީފަ އެވެ.
ހާމިދު ގޭބަންދަށް ބަދަލުކުރުމަށްފަހު މިދިޔަ ބުރާސްފަތިދުވަހު ތާވަލުކުރި އެމައްސަލާގެ ފުރަތަމަ އަޑުއެހުން ވަނީ ކެންސަލްކޮށްފަ އެވެ. ކޯޓުން ބުނީ އެމައްސަލައިގެ އަޑުއެހުން ކެންސަލްކުރީ ޕީޖީ އެދިގެން ކަމަށެވެ.
ހާމިދުގެ މައްޗަށް އެ ދައުވާ އުފުލީ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުންނެވެ. އެއީ އެ ގާނޫނުގެ ދަށުން އުފުލި ފުރަތަމަ ދައުވާ އެވެ.
ފުލުހުން ބުނީ ހާމިދުގެ މައްޗަށް ތުހުމަތު ކުރެވެނީ އެމްއެމްޕީއާރްސީގެ ފައިސާއާ ގުޅުންހުރި މަނީލޯންޑަރިންގެ މައްސަލައެއް ކަމަށެވެ. ނަމަވެސް އެ މައްސަލައިގެ ތަފްސީލު މިހާތަނަށް ފުލުހުން ހާމަކޮށްފައެއް ނުވެއެވެ.
މަނީލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގައި ބުނާ ގޮތުން މަނީލޯންޑަރިންގެ ކުށެއްކޮށްފި މީހެއްގެ އަދަބަކީ 100،000 ރުފިޔާ އާއި 1،000،000 ރުފިޔާއާ ދެމެދުގެ އަދަދަކުން ޖޫރިމަނާކުރުމާ އެކު ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.
ނުވަތަ ކުށުގެ އަމަލުހިންގުމަށް ބޭނުންކުރި ފައިސާގެ އަދަދުގެ ފަސްގުނައަށްވުރެ އިތުރުނުވާ އަދަދަކުން ޖޫރިމަނާކުރުމާއެކު ފަސް އަހަރާއި 15 އަހަރާ ދެމެދުގެ މުއްދަތަށް ޖަލަށްލުމެވެ.
އެ ގާނޫނުގައި ބުނެފައި ވަނީ މަނީލޯންޑަރިންގެ ކުށެއް ކުރުމަށް އުޅުމާއި ނުވަތަ އެކުށް ކުރުމަށް އެހީތެރިވެދިނުމާއި ނުވަތަ މަގުފަހިކޮށްދިނުމާއި ނުވަތަ މަގުފަހިކޮށްދިނުމަށް ހިތްވަރުދިން މީހެއްގެ އަދަބަކީ 50،000 ރުފިޔާ އާއި 500،000 ރުފިޔާއާ ދެމެދުގެ އަދަދަކުން ޖޫރިމަނާކުރުމާއެކު ދެ އަހަރާއި 10 އަހަރާ ދެމެދުގެ މުއްދަތަކަށް ޖަލަށްލުން ކަމަށެވެ.
އެ އަދަބު ނޫންނަމަ ކުށުގެ އަމަލުހިންގުމުގައި ބޭނުންކުރި ފައިސާގެ އަދަދުގެ ފަސް ގުނައަށްވުރެ އިތުރުނުވާ އަދަދަކުން ޖޫރިމަނާ ކުރުމާއެކު ދެ އަހަރާއި 10 އަހަރާ ދެމެދުގެ މުއްދަތަށް ޖަލަށްލުން ކަމަށް ވެސް އެ ގާނޫނުގައި ވެއެވެ.