22 Jan 2016, 15:32
ކިޑުނީ ޓްރާންސްޕްލަންޓު ހަދައިދިނުމުގެ ޚިދުމަތާ އެކު މިއަހަރުގެ ތެރޭގައި އައިޖީއެމްއެޗުގައި ސުޕާ ސްޕެޝަލްޓީ ކިޑުނީ ސެންޓަރެއް ގާއިމްކުރާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
"އުންމީދީ15" މިނަމުގައި ޕީޕީއެމާއި އެމްޑީއޭ ގުޅިގެން ރޭ ކާނިވަލުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ ސުޕާ ސްޕެޝަލްޓީ ކިޑުނީ ސެންޓަރުގައި މަސައްކަތް ކުރާނީ މި ސަރަހައްދުގެ ކޮލިފައިޑު މީހުން ކަމށެވެ.
އާދެ ކުޑަކަމުދާ ނިޒާމުގެ މައްސަލަ ހުންނަ ފަރާތްތަކާއި ކިޑުނީގެ މައްސަލަ ހުންނަ ފަރާތްތަކަށް ސުޕާ ސްޕެޝަލްޓީ ކިޑުނީ ސެންޓަރެއް އަޅުގަނޑުމެން އިރާދަކުރެއްވިއްޔާ މިއަހަރުގެ ތެރޭގައި ގާއިމްކުރާނަން. އަދި މިދެންނެވި ސުޕާސްޕެޝަލިސްޓު މެޑިކެއާ ސެންޓަރުން އަޅުގަނޑުމެން އިރާދަކުރެއްވިއްޔާ ރާއްޖޭގައި ކިޑްނީ ޓްރާންސްޕްލަންޓު ހަދައިދޭނަން. އެކަމަށް ސަރަހައްދުގެ ކޮލިފައިޑް މީހުން އަޅުގަނޑުމެން މިގެންނަނީ. އިރާދަކުރެއްވިއްޔާ މިއަހަރުގެ ތެރޭގައި މިކަން ވެސް ވެގެންދާނެ
ރައީސް ޔާމީން
ރައީސް ވިދާޅުވީ މިސަރަހައްދުގައި ހުރި އެންމެ ރަނގަޅު ނޭޝަނަލް ޑައިގްނޯސްޓިކް ސެންޓަރެއް ސެޕްޓެމްބަރު މަސް އައުމުގެ ކުރިން އައިޖީއެމްއެޗުގައި ގާއިމްކުރާނެ ކަމަށެވެ. އެ ސެންޓަރު ގާއިމް ކުރުމުން މިހާރު ރާއްޖޭގައި ނެހެދޭ އެތަކެއް ޓެސްޓުތައް އައިޖީއެމްއެޗުން ހެދިގެންދާނެ އެވެ.
އޭގެއިތުރުން ހިތުގެ ބަލީގެ ފަރުވާދިނުމަށް މި ސަރަހައްދުގައި ހުރި އެންމެ ރަނގަޅުފެންވަރުގެ ކެތު ލެބެއް މިއަހަރުގެ ތެރޭގައި އައިޖީއެމްއެޗުގައި ގާއިމް ކުރާނެ ކަމަށް ރައީސް ޔާމީން ވިދާޅުވިއެވެ.
"މިކަމުގެ ބޭނުމަކަށްވާނީ، މިކަމުން ފައިދާކުރާނީ ހަގީގަތުގަވެސް ހިތުގެ ބަލި ހުންނަ ފަރާތްތަކަށް. މިއީވެސް އަޅުގަނޑުމެންނަށް އެނގޭ ކަންކަމެއް ނޫން. އެހެންނަމަވެސް ހިތުގެ އުނދަގުލެއް ކުރާ ކޮންމެ ފަހަރަކު، ކޮންމެ މީހަކު ރާއްޖެއިން ބޭރަށް ދިޔުމަކީ ފަސޭހަ ކަމެއް ވެސް ނޫން. އަދި ވަގުތާއި މޫސުން ވެސް ގިނަ ފަހަރު ތަންނުދޭ. އެހެންނަމަވެސް އަޅުގަނޑުމެންގެ ރާއްޖޭގައި ކެތުލެބެއް ގާއިމްކުރެވިއްޖެ ކަމަށް ވަންޏާ މިހާރު ނުލިބޭ ފަރުވާ، މިހާރު އަޅާނުލެވޭ ކިތަންމެ ބަޔަކަށް މި އެހީތެރިކަން ލިބިވަޑައިގަންނަވާނެ ކަމާ މެދު އަޅުގަނޑު ޝައްކެއް ނުކުރަން،" ރައީސް ވިދާޅުވިއެވެ.
ރައީސްގެ ވާހަކަފުޅުގައި އެމަނިކުފާނު އަވަހާރަކޮށްލަން ބަޔަކު މަސައްކަތް ކުރަނީ ރައްޔިތުންނަށް ކޮށްދެއްވާ މިފަދަ މުހިންމު ޚިދުމަތްތަކުގެ ސަބަބުންތޯ ވިދާޅުވެ ސުވާލު އުފެއްދެވިއެވެ.
"އަޅުގަނޑު ރައްޔިތުންނަށް މިހަލަކަންތައްކޮށްދޭތީތޯ އަޅުގަނޑު މަރާލަން މިޖެހެނީ. އަޅުގަނޑު ދަންނަވާލަން ބޭނުންވަނީ އަޅުގަނޑުމެން މިކުރާ މަސައްކަތަކީ ދިވެހީންނަށް އުފާވެރިކަން ގެންނަން ކުރާ މަސައްކަތް. އަޅުގަނޑުމެން މިކުރާ މަސައްކަތަކީ ރާއްޖޭގެ ރައްޔިތުންނަށް އުނދަގޫތަކާ ތުރާތަކުން ކޮންމެވެސް ކަހަލަ ތަސައްލީއެއް، ހަމަޖެހުމެއް ގެނެސްދިނުމަށްޓަކައި ކުރަން ބޭނުންވާ ކަންތައް،" ރައީސް ޔާމީން ވިދާޅުވިއެވެ.