21 Jan 2016, 16:33
ހޯމް މިނިސްޓަރު އުމަރު ނަސީރު މުޒާހަރާއެއްގައި ދެއްކެވި ވާހަކަފުޅެއްގެ މައްޗަށް ބިނާކޮށް އެމަނިކުފާނުގެ މައްޗަށް އުފުލި ދައުވާ އަނބުރާ ގެންގޮސް ފުލުހުންނަށް ފޮނުވާލުމުގައި މިހާރުގެ ޕްރޮސިކިއުޓާ ޖެނެރަލް އާއިޝަތު ބިސާމްގެ އެއްވެސް ދައުރެއް ނެތް ކަމަށް ޕްރޮސިކިއުޓާ ޖެނެރަލްގެ އޮފީހުން ބުނެފިއެވެ.
ޕީޖީ އޮފީހުގެ އޮފިޝަލަކު މިއަދު ސަން އަށް ވިދާޅުވީ އެ މައްސަލަ އެންމެ ފުރަތަމަ ކްރިމިނަލް ކޯޓަށް ހުށަހަޅާފައި ވަނީ 2013 ވަނަ އަހަރުގެ ޑިސެމްބަރު މަހުގެ 11 ވަނަ ދުވަހުއެވެ. އަދި ކްރިމިނަލް ކޯޓުން މައްސަލަ އަނބުރާ ގެންދަން އެދުނީ 2014 ވަނަ އަހަރުގެ އޯގަސްޓު މަހުގެ ހަތް ވަނަ ދުވަހު ކަމަށާއި ކްރިމިނަލް ކޯޓުން އެ މައްސަލަ އަނބުރާ ފޮނުވީ އެއަހަރުގެ ސެޕްޓެމްބަރު މަހުގެ ނުވަ ވަނަ ދުވަހު ކަމަށް ވެސް އޮފިޝަލް ވިދާޅުވިއެވެ.
އޮފިޝަލް ވިދާޅުވީ ފުލުހުންނަށް މައްސަލަ އަނބުރާ ފޮނުވަން ނިންމީ މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހު ކަމަށާއި ލިޔެކިޔުންތައް ތައްޔާރުކޮށް މައްސަލަ އަނބުރާ ފުލުހުންނަށް ފޮނުވާލާފައި ވަނީ ނޮވެމްބަރު މަހުގެ 30 ވަނަ ދުވަހު ކަމަށެވެ.
"އެހެންކަމުން މިއީ ބިސާމް ޕީޖީ ކަމުގެ މަގާމާ ހަވާލުވެވަޑައިގަތުމުގެ ކުރިން ނިންމާފައިވާ ނިންމުމެއް،" އޮފިޝަލް ވިދާޅުވިއެވެ.
އުމަރުގެ މައްސަލަ އަނބުރާ ފޮނުވާލާފައި ވަނީ އެ މައްސަލާގައި ފުލުހުން ހުށަހަޅާފައިވާ ވީޑިއޯ އެނަލިސިސް ރިޕޯޓު ތައްޔާރުކޮށްފައިނުވާތީއެވެ.
އުމަރުގެ މައްޗަށް އަމުރަށް ނުކިޔަމަންތެރިވުމުގެ ދައުވާ ކުރިން އުފުލީ 2012 ވަނަ އަހަރުގެ ޖެނުއަރީ މަހުގެ 22 ވަނަ ދުވަހުގެ ރޭ އެމްއެމްއޭ ސަރަހައްދުގައި ބޭއްވި މުޒާހަރާގައި 50 ފޫޓުގެ ހަރުގަނޑެއް ބޭނުންކޮށްގެން ސިފައިންގެ މައި މަރުކަޒަށް ވަންނަން އުޅޭކަމަށް ދޭހަވާގޮތަށް ވާހަކަފުޅު ދެއްކެވި ކަމުގެ ތުހުމަތުގައެވެ. ނަމަވެސް އެ ތުހުމަތަށް އުމަރު ވަނީ އިންކާރު ކުރައްވާފައެވެ.