18 Jan 2016, 15:36
ވައިބާ ބޭނުންކުރައްވާ ފަރާތްތަކަށް ހާއްސަ ޕެކޭޖްތަކެއް އުރީދޫ އިން ތައާރަފްކޮށްފި އެވެ.
އުރީދޫ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ ހެޑް އޮފް ސޭލްސް ހުސެއިން ނިޔާޒު ވިދާޅުވީ ވައިބާއާ ގުޅިގެން އުރީދޫ އިން ތައާރަފްކުރި "ވައިބާ ޕެކް"ތަކުގެ ސަބަބުން ހެޔޮއަގުގައި ވައިބާ ބޭނުންކުރެވޭނެ ކަމަށެވެ.
އެއް ދުވަހު ވައިބާ ބޭނުންކުރެވޭ ގޮތަށް ތައާރަފްކޮށްފައި ވާ "ވައިބާ5" އިން ފަސް ރުފިޔާއަށް 30 އެމްބީއާ ހަމައަށް ވައިބާ ބޭނުން ކުރެވެއެވެ. އަދި "ވައިބާ11" ޕެކޭޖުން 11 ރުފިޔާއަށް ފަސް ދުވަހުގެ ތެރޭގައި 80 އެމްބީއާ ހަމައަށް ވައިބާ ބޭނުންކުރެވެ އެވެ.
"ވަރަށް ކުޑަކުޑައަގެއްގައި ވައިބާ ޕެކްތަކެއް މިލިބެނީ، ވައިބާ ވޮއިސްކޯލް ފިޔަވައި އެހެން ހުރިހާ ކަމެއް އޭގެ ތެރެއިން ކުރެވޭނެ. ފޮޓޯ ފޮނުވޭނެ، ސްޓިކާ ފޮނުވޭނެ، ޗެޓް ކުރެވޭނެ." ނިޔާޒު ވިދާޅުވި އެވެ.
އުރީދޫގެ ސީނިއާ އެގްޒެކްޓިވް ޕަބްލިކްރިލޭޝަންސް، ނޫރާ އިބްރާހިމް ޒާހިރު ވިދާޅުވީ އެޕެކޭޖްތައް މެދުވެރިކޮށް ފޮޓޯ އާއި ވީޑިއޯ ވެސް ޑައުންލޯޑް ކުރެވޭނެ ކަމަށެވެ. އެޕެކޭޖްތައް ފަސޭހަކަމާ އެކު އެކްޓިވޭޓް ކުރެވޭނެ ކަމަށް ނޫރާ ވިދާޅުވި އެވެ.
"ވައިބާ ޕެކް އެކްޓިވޭޓް ކުރުމަށް ވަރަށް ވެސް ފަސޭހަ ވާނެ، ހަމަ ބޭނުންވާ ޕެކްއެއް ހިޔާރު ކުރައްވަންވީ، ވައިބާ ޕެކް ފަހެއް ނަމަ 5 ޖައްސަވާފައި، ވައިބާ ޕެކް 11 ނަމަ 11 ޖައްސަވާފައި، 5555 އަކަށް މެސެޖް ކުރައްވާނީ." ނޫރާ ވިދާޅުވި އެވެ.