18 Jan 2016, 12:43
ތޭރަ އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް މުހައްމަދު ނަޝީދު ޖަލު މުވައްޒަފެއްގެ މޫނަށް މިއަދު ކުޅު ޖެއްސެވި ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު ނަސީރު މިއަދު ކުރެއްވި ޓުވީޓެއްގައި ވިދާޅުވީ ޖަލުގައި މަސައްކަތް ކުރާ ސިވިލް މުވައްޒަފެއްގެ މޫނަށް ނަޝީދު މިއަދު ކުޅު ޖެއްސެވި ކަމަށާއި އެ އަމަލު ކުށްވެރި ކުރައްވާ ކަމަށާއި އަދި ޖަލު މުވައްޒަފުންނަށް އިހްތިރާމު ކުރުމަށް ރައީސް ނަޝީދަށް އިލްތިމާސް ކުރައްވާ ކަމަށެވެ.
PNasheed today spat on the face of a civilian working for the prison. I condemn this and urge PN to respect the diginity of our staff.
— Umar Naseer (@UmarNaseerPPM)January 18, 2016
ނަޝީދުގެ ބޭސް ފަރުވާ އަކަށް އިނގިރޭސި ވިލާތަށް ވަޑައިގަތުމަށް ހުއްދަ ދެއްވި ގޮތާ ބެހޭ ގޮތުން ނަޝީދާއި ހޯމް މިނިސްޓްރީއާ ދެމެދު އަންނަނީ ބަހުގެ ހަމަލާތައް ބަދަލު ކުރަމުންނެވެ.
ހޯމް މިނިސްޓަރު ވިދާޅު ވަނީ ރައީސް ނަޝީދު އިނގިރޭސިވިލާތަށް ފޮނުވުމަށް ދެ ފަރާތުންވި އެއްބަސްވުން ސޮއި ކުރެއްވުމަށް ފަހު ނަޝީީދު ވަނީ އެ ލިޔުން ވީދާލާފައި ކަމަށާއި އެ ލިޔުމުގެ ބަދަލުގައި އިތުރު ލިއުމެއްގައި ސޮއިކޮށް، އަދި އެމަނިކުފާނުގެ އާއިލާ އިން ސޮއިކުރަން ޖެހޭ ލިޔުމުގައި ސޮއިކުރުމުން ނޫނީ ރައީސް ނަޝީދަށް ރާއްޖެ އިން ބޭރަށް ވަޑައިނުގެންނެވޭނެ ކަމަށެވެ.
ސަން އަށް މިއަދު ދެއްވި އިންޓަވިއުއެއްގައި ހޯމް މިނިސްޓަރު އުމަރު ވިދާޅުވީ އެ ލިޔުންތަކުގައި ސޮއިކުރެއްވުމުން ވަގުތުން ރައީސް ނަޝީދު އެއާޕޯޓަށް ގެންދާނެ ކަމަށެވެ.
ނަޝީދުގެ ވަކީލުން ވިދާޅު ވަނީ ބޭރުގެ ފަރާތްތަކާ އެކު ސަރުކާރުން އެއްބަސްވެފައި ވަނީ އެއްވެސް ޝަރުތެއް ނެތި ރައީސް ނަޝީދު ބޭސްފަރުވާ އަށް ފޮނުވުން ކަމަށެވެ. އަދި ބޭރުގެ މަންދޫބުންގެ ހާޒިރުގައި އެ ގޮތަށް އެއްބަސްވުމަށް ފަހު އެ ނިންމުން ބަދަލުކޮށްފައިވާ ކަމަށެވެ.
ނަމަވެސް ސަރުކާރުން ބުނަނީ ގާނޫނީ ގޮތުން ފުރިހަމަކުރަން ޖެހޭ ހުރިހާ ޑޮކިއުމެންޓުތަކުގައި ސޮއިކުރުމުން ވަގުތުން ރައީސް ނަޝީދު އެއާޕޯޓަށް ގެންދާނެ ކަމަށެވެ.
"އަޅުގަނޑުގެ މެސެޖަކީ މިއީ ގާނޫނީ ހުކޫމަތު ހިނގާ ގައުމެކޭ. އެހެންވީމާ ގާނޫނީ ގޮތުން ފުރިހަމަ ކުރަން ޖެހޭ ހުރިހާ ޑޮކިއުމެންޓުތައް ފުރިހަމަކުރާށޭ. މިއަދު ވެސް ހަމަ ފުރޭނެ އެއިރުން. ސޮއިކުރާއިރަށް ވަގުތުން އެއާޕޯޓަށް ގެންދާނަން،" އުމަރު ވިދާޅުވި އެވެ.