17 Jan 2016, 14:45
ތާޒާ ބްރޭންޑުގެ ފަސް ލީޓަރުގެ ފެން އުފައްދާ އިތުރު ޕްލާންޓެއް ގެނެސް ފެން އުފައްދާ މިންވަރު މިހާރަށް ވުރެ އިތުރު ކުރަން ނިންމާފައިވާ ކަމަށް އެމްޑަބްލިއުއެސްސީ އިން ބުނެފި އެވެ.
ފެންކުންފުނީގައި މިއަދު މީޑިއާ އަށް މައުލޫމާތު ދެއްވަމުން އެމްޑަބްލިއުއެސްސީގެ މެނޭޖިންގް ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ، މީހާރު ކުރިއަށް ދަނީ ޕްލާންޓް މާލެ ގެނެސް ރޭވުމުގެ މަސައްކަތް ކަމަށެވެ. އަދި ޕްލާންޓް އެއްކޮށް ނިމި އަންނަ ފެބުރުއަރީ މަހު ފަހުކޮޅު ކޮމިޝަން ކުރަން ފެއްޓޭނެ ކަމަށް ވެސް އޭނާ ވިދާޅުވި އެވެ.
"...މި ފައިވް ލީޓަރު ލައިނަކީ ވެސް އަޅުގަނޑުމެންގެ ޑިވެލޮޕްމެންޓަށް އެޅިގެންދާ ވަރަށް ބޮޑު ބިންގަލެއް. އިމަޖެންސީ ހާލަތްތަކުގައި ރާއްޖޭގެ އުތުރާއި ދެކުނުން ވެސް ބައެއް ފަހަރު ހޫނު މޫސުމުގެ ސަބަބުން ދިމާވާ ފެނުގެ ދަތިކަން ހައްލު ކުރުމަށް ވެސް....މި ބޮޓެލިންގް ޕްލާންޓުގެ ސަބަބުން އަޅުގަނޑުމެންގެ މާކެޓު ފުޅާވެގެން މި ދިޔައީ..."، ފަޒުލް ވިދާޅުވި އެވެ.
އޭނާ ވިދާޅުވީ މިހާރު ހުރި ޕްލާންޓުން ރާއްޖޭގެ އެންމެންނަށް ބޭނުންވާ ވަރަށް ފެން ނު އުފެއްދުނު ނަމަވެސް އަލަށް ގެނައި ޕްލާންޓުން އެންމެންނަށް ބޭނުންވާ ވަރަށް ފެން އުފެއްދޭނެ ކަމަށެވެ.
"ހަގީގަތުގައި ޑިމާންޑާއި ސަޕްލައިއާ މީޓެއް ނުވޭ. އެހެންވެ ޑިމާންޑާއި ސަޕްލައިއާ މީޓް ކުރުމަށް ޓަކައި އަޅުގަނޑުމެން މި ޕްލާންޓް ތައާރަފު ކުރަނީ. ރާއްޖޭގެ ރައްޔިތުންނަށް ބޮޓެލިންގް ފެން ފަސޭހަކަމާ އެކު އަގު ހެޔޮކޮށް ލިބުމުގެ އިތުރުން، އިތުރު ވަޒީފާގެ ފުރުސަތުތަކެއް ވެސް އުފެދިގެން ދާނެ"، ފަޒުލް ވިދާޅުވި އެވެ.
އެމްޑަބްލިއުއެސްސީގައި މިވަގުތު ހުރި ޕްލާންޓުން ގަޑިއެއްގެ ތެރޭގައި އުފައްދައި ދެނީ، 2500 ލީޓަރުގެ ފެނެވެ. އެހެންނަމަވެސް އަލަށް ގެނައި ޕްލާންޓުން ގަޑިއެއްގެ ތެރޭގައި 4000 ލީޓަރުގެ ފެން އުފައްދައި ދޭނެ ކަމަށް އެ ކުންފުނިން ބުންޏެވެ.
ފަޒުލް ވިދާޅުވީ ކުރިއަށް އޮތްތާނގައި ހދ. ކުޅުދުއްފުށީގައި ވެސް އެފަދަ ޕްލާންޓެއް ގާއިމު ކުރަން ނިންމާފައިވާ ކަމަށެވެ. އަދި މިހާރު ކުރިއަށް ދަނީ ކުޅުދުއްފުށީގައި ބަހައްޓާ ޕްލާންޓުގެ ޑިޒައިނިން މަސައްކަތް ކަމަށް ވެސް އޭނާ ވިދާޅުވި އެވެ.