17 Jan 2016, 11:55
އިނގިރޭސި ޕްރިމިއާ ލީގްގައި ރޭ އެވަޓަން ކޮޅަށް ޖޯން ޓެރީ ޖެހި ގޯލަކީ އޮފްސައިޑް ގޯލެއް ނަމަވެސް އެއީ ވަރަށް ރީތި ގޯލެއް ކަމަށް ޗެލްސީގެ ކޯޗް ގޫސް ހިޑިންކް ބުނެފި އެވެ.
ރޭގެ މެޗުގެ ފުރިހަމަ ވަގުތު ހަމަވި އިރު 3-2ގެ ނަތީޖާ އަކުން އެވަޓަން ކުރީގައި ވަނިކޮށް އިތުރު ވަގުތުގެ ގޮތުގައި ދެއްކި ހަތް މިނެޓްތެރޭގައި ޓެރީ އެ ގޯލު ކާމިޔާބު ކުރި އިރު އޭނާ ހުރީ އޮފްސައިޑްގަ ކަން ހިޑިންކް ވަނީ އެއް ބަސްވެފަ އެވެ.
"އެވަޓަންގެ ކޯޗު އެބުނަނީ ހަމަ ރަނގަޅަށް. ޓެރީ އޮފްސައިޑްގައި ހުރެ ކާމިޔާބު ކުރީ ވަރަށް ރީތި ގޯލެއް. ނަމަވެސް ބައެއް ފަހަރު ރެފްރީން ނަށް ވެސް ނިންމޭނެ ގޯސް ނިންމުން. އެކަމަށް އަހަރެމެން ޖެހޭނެ އިޚްތިރާމް ކުރިން،" ހިޑިންކް ބުންޏެވެ.
މެޗަށް ފަހު ވާހަކަ ދައްކަމުން އެވަޓަންގެ ކޯޗު ރޮބާޓޯ މާޓިނޭޒް ބުނީ އެ މެޗުގެ އިތުރު ވަގުތަގައި އެކަނި ވެސް ރެފްރީގެ ފަރާތުން ބޮޑު ދެ މިސްޓޭކް ފެނިގެން ދިޔަ ކަމަށާއި އެ މެޗުގައި ރެފްރީކަން ކުރީ އެއްވެސް ވަރަކަށް ރެފްރީކަން ކުރަމުގެ ގާބިލު ކަން ހުރި ރެފްރީއެއް ނޫން ކަމަށެވެ.
"ހަތް މިނެޓް އިތުރު ވަގުތުގެ ގޮތުގައި ދެއްކި އިރު ޓެރީ ގޯލް ޖަހާފައި ވަނީ އަށް ވަނަ މިނެޓްގައި. މެޗު ބަލަން އިން ކޮންމެ މީހަކަށް ވެސް އެނގޭނެ އެއީ އޮފްސައިޑް ގޯލެއް ކަން. ރެފްރީގެ ފަރާތުން ފެނިގެން އެ ދިޔައީ އެއް ވެސް ވަރަކަށް ބަލައިގަނެވޭނެ ފަދަ ކަންތައްތަކެއް ނޫން،" މާޓިނޭޒް ބުންޏެވެ.
ރޭގެ މެޗުން އެވަޓން މޮޅުވި ނަމަ އެކަންވެގެންދާނީ ޗެލްސީގެ ދަނޑުގައި އެޓީމު އަތުން ފާއިތުވެ ދިޔަ 21 އަހަރު ތެރޭގައި އެވަޓަން މޮޅުވާ ފުރަތަމަ ފަހަރަށްވާ އިރު މާޓިިނޭޒް ބުނީ ރަނގަޅު ރެފްރީއެއް ހުރި ނަމަ ރޭގެ މެޗުން އޭނާގެ ޓީމު މޮޅުވާނެ ކަމާ މެދު އެއް ވެސް ވަރަކަށް ޝައްކު ނުކުރާ ކަމަށާއި ކުޅުންތެރިންގެ ފަރާތުން ވެސް ފެނިފައި ވަނީ މޮޅު ކުޅުމެއް ކަމަށެވެ.
ރޭގެ މެޗުން ޗެލްސީ އެއްވަރު ވުމުން އެ ޓީމްގެ ކޯޗުކަމާއި ހިޑިންކް ހަވާލުވި ފަހުން ކުޅުނު ހަތް މެޗުން ވެސް ބަލިވެފައި ނުވާ އިރު އެ ޓީމް މި ވަގުތު އޮތީ 25 ޕޮއިންޓާ އެކު ތާވަލުގެ 14 ވަނާގަ އެވެ. އަދި އެވަޓަން އޮތީ 29 ޕޮއިންޓާ އެކު 11 ވަނައިގަ އެވެ.