16 Jan 2016, 15:16
ޕެރިސް (ޖެނުއަރީ 16):އަލަށް އުފައްދާފައިވާ ބޭހެއް ކްލިނިކަލް ޓްރައަލްއެއްގައި ޓެސްޓު ކުރުމަށް 90 މީހުންނަށް ދިނުމުގެ ސަބަބުން އޭގެ ތެރެއިން އެކަކުގެ ސިކުނޑި މަސައްކަތް ކުރުން ހުއްޓި، ތިން މީހެއްގެ ސިކުނޑިއަށް ދާއިމީ ގެއްލުންތައް ލިބިފައިވާ ކަމަށް ލަފާކުރެވޭ ކަމަށް އެމީހުންނަށް ފަރުވާދެމުންދާ ހޮސްޕިޓަލުން ބުނެފި އެވެ.
ޖޫން މަހު ފެށި އެ ޓުރައަލް އަކީ ބޭސް ޓެސްޓް ކުރުމަށް ހާއްސަ ފްރާންސުގެ ކުންފުންޏެއް ކަމަށްވާ ބައޯޓްރައަލް އިން ހެދި ދިރާސާއެކެވެ. އެ ބޭސް އުފައްދާފައި ވަނީ ޕޯޗުގަލްގެ ކުންފުންޏަކުންނެވެ.
ބޭސް ބޭނުން ކުރުމުގެ ސަބަބުން ސިއްހީ ހާލަތު ދަށްވެގެން ހޮސްޕިޓަލުގައި ފަރުވާދެމުންދާ ފަސް މީހުންގެ ތެރެއިން ތިން މީހުންގެ ސިކުނޑިއަށް ދާއިމީ ގެއްލުން ލިބިފައިވާ ކަމަށް ލަފާ ކުރެވޭ ކަމަށް ހޮސްޕިޓަލުގެ ނިއުރޯސައިންޓިސްޓަކު ވިދާޅުވި އެވެ. އަދި އޭގެ ތެރެއިން އެކަކަށް ނާރުގެ މައްސަލަ ޖެހިފައިވާ ކަމަށް ވެސް ސައިންސުވެރިޔާ ވިދާޅުވި އެވެ.
އެ ޓްރައަލްގައި ބައިވެރިވި ބާކީ މީހުންގެ ސިއްހީ ހާލަތު މިހާރު ދަނީ ބަަލަމުންނެވެ. އަދި ފްރާންސުގެ ޕްރޮސެކިއުޓަރުގެ އޮފީހުން ވަނީ އެމައްސަލަ ތަހުގީގު ކުރަން ފަށައިފަ އެވެ.
އެފަދަ ކްލިނިކަލް ޓްރައިލްތަކުގެ ފޭސް އެކެއްގައި ބައިވެރިވާނީ ސިއްހަތު ރަނގަޅު މީހުން އަމިއްލައަށް ބޭނުންވެގެން އެވެ. (ބީބީސީ)