16 Jan 2016, 11:59
ނުކުޅެދުންތެރިކަން ހުންނަ ކުދިންނަށް އާދައިގެ ކްލާސްރޫމެއްގައި ކިޔަވަދޭނެ ގޮތްތަކާއި އެ ކުދިން ގެންގުޅޭނެ ގޮތްތައް ޓީޗަރުންނަށް ދަސްކޮށްދިނުމުގެ މަސައްކަތު ބައްދަލުވުމެއް މިއަދު ފަށައިފި އެވެ.
އޯޓިޒަމް އެސޯސިއޭޝަނުން އިންތިޒާމުކޮށްގެން ތިން ދުވަހުގެ މުއްދަތަށް، ކަސްޓަމްސްގެ މީރުބަހުރު މާލަމުގައި ކުރިއަށް ގެންދާ އެ މަސައްކަތު ބައްދަލުވުމުގެ މައިގަނޑު މަގުސަދަކީހުރިހާ ކުދިން ޝާމިލުކޮށްގެން ކިޔަވަދިނުމުގެ ގާބިލުކަން ޓީޗަރުންގެ ކިބައިގައި އަށަގެންނެވުން ކަމަށް އޯޓިޒަމް އެސޯސިއޭޝަނުން ބުނެ އެވެ.
އެ މަސައްކަތު ބައްދަލުވުމުގައި ކިޔަވައިދެއްވަނީ، އެމެރިކާގެ ޓެކްސަސްގެ ކްރިސްޓިއަން ޔުނިވަސިޓީ ކޮލެޖު އޮފް އެޑިޔުކޭޝަންގެ ތަޖުރިބާކާރެއް ކަމަށްވާ ޑރ. ލިންދީ ކްރޯފޯޑް އެވެ.
އެގޮތުން ހުރިހާ ކުދިން އެއްފަހަރާ ކްލާސްތެރޭގައި ގެންގުޅޭނެ އުކުޅުތަކާއި އެކިއެކި ހާލަތްތައް ދިމާވެފައިވާ ކުދިންނަށް ކިޔަވަދޭނެ ގޮތްތައް ވެސް އެ މަސައްކަތު ބައްދަލުވުމުގައި ޓީޗަރުންނަށް ދަސްކޮށްދެވޭނެ ކަމަށް އެ އެސޯސިއޭޝަނުން ބުނެ އެވެ.
އެ މަސައްކަތު ބައްދަލުވުމުގައި މާލޭގެ ސްކޫލްތަކުންނާއި މަދަނީ ޖަމިއްޔާ، ޖަމާއަތްތަކުން ޖުމްލަ 30 މީހަކު ބައިވެރިވެފައިވެ އެވެ.
ނުކުޅެދުންތެރިކަން ހުންނަ ކުދިންގެ ބެލެނިވެރިންނާއި ޓީޗަރުންނަށް ހާއްސަކޮށްގެން، ކޮންމެ އަހަރަކު ވެސް އެކިއެކި މަސައްކަތު ބައްދަލުވުންތައް އޯޓިޒަމް އެސޯސިއޭޝަނުން އަންނަނީ ބާއްވަމުންނެވެ.