16 Jan 2016, 09:24
މެކްސިކޯގައި ފުޅާދާއިރާއެއްގައި މަސްތުވާތަކެތީގެ ވިޔަފާރި ހިންގާ ގޭންގެއްގެ ވެރިއެއް ކަމަށްވާ ޖޯގިން ގުޒްމަން، އިނގިރޭސި ޕްރިމިއާ ލީގުގެ ކްލަބެއް ކަމަށްވާ ޗެލްސީ ފުޓްބޯލް ކްލަބް ގަންނަން ޝައުގުވެރިވި ކަމަށް މީޑިއާ ރިޕޯޓްތައް ބުނެފި އެވެ.
ސްޕެއިންގެ ކުޅިވަރު ހަބަރުތައް ގެނެސްދޭ "ސްޕޯޓްސް" ވެބްސައިޓާއި މެކްސިކޯގެ އިދާރާތަކާ ހަވާލާދީ މީޑިއާގައި ރިޕޯޓް ކޮށްފައިވާ ގޮތުން، ގުޒްމާން އަކީ ފުޓްބޯޅައަށް ލޯބިކުރާ، ޗެލްސީގެ ސަޕޯޓަރެކެވެ.
ޗެލްސީ ގަތުމަށް އޭނާ ވަރަށް "ސީރިއަސް"ކަމާ އެކު ވިސްނި ކަމަށާއި އޭނާ ބޭނުންވީ ފުޓްބޯޅައިން އާ ވިޔަފާރިއެއް ފަށަން ކަމަށް ވެސް ބުނެފައިވެ އެވެ.
ޗެލްސީގެ މިހާރުގެ ވެރިއަކީ ރަޝިއާގެ ވިޔަފާރިވެރިޔާ އަދި އިންވެސްޓަރެއް ކަމަށްވާ ރޯމަން އަބްރަމޯވިޗެވެ.
ރަޝިއާގެ އެންމެ މުއްސަނދި މީހުންގެ ލިސްޓުގެ 12 ވަނަ މަގާމުގައި އޮތް އެބްރަމޮވިޗް ޗެލްސީ ގަނެފައި ވަނީ 140 މިލިއަން ޔޫރޯއަށް 2003 ވަނަ އަހަރު އެވެ.
އެމެރިކާގެ މަޝްހޫރު ވިޔަފާރި މަޖައްލާއެއް ކަމަށްވާ ފޯބްސް އިން މިދިޔަ އަހަރު ނެރުނު ދުނިޔޭގެ އެންމެ މުއްސަނދި ފުޓްބޯޅަ ކްލަބްތަކުގެ ލިސްޓުގައި ޗެލްސީ އޮތީ ހަ ވަނައިގަ އެވެ.
ފޯބްސް އިން ބުނާ ގޮތުން އެ ކްލަބަށް ފައިދާގެ ގޮތުގައި މިދިޔަ އަހަރު ވަނީ 1.37 ބިލިއަން އެމެރިކާ ޑޮލަރު ލިބިފަ އެވެ.
ދުނިޔޭގައި މިހާތަނަސް ހިންގާފައިވާ ޑްރަގް ޓްރެފިކް ކުރުމުގެ އެންމެ ނުރައްކާތެރި އަދި ވަރުގަދަ އޮޕަރޭޝަންތަކުގައި އެންމެ އިސްކޮށް ހުރި ކަމަށް ބެލެވޭ ގުޒްމާން ވަނީ ދެ ފަހަރެއްގެ މަތިން އޭނާ ހައްޔަރުކޮށްފައި ހުރި ޖަލުން ފިލައިފަ އެވެ.
އެގޮތުން މެކްސިކޯގެ އެންމެ ސެކިއުރިޓީ ވަރުގަދަ ޖަލަކުން ބިންގަރާހެއް ބޭނުންކޮށްގެން މިދިޔަ އަހަރުގެ ޖުލައި މަހުގެ ތެރޭގައި ފިލައިންގެން އުޅެނިކޮށް އޭނާ އެންމެ ފަހުން ހައްޔަރުކޮށްފައި ވަނީ މިމަހުގެ ނުވަ ވަނަ ދުވަހު އެވެ.
މައުލޫމާތު: ގޯލް.ކޮމް/ އިންޓަނޭޝަނަލް ބިޒްނަސް ޓައިމްސް